17.12.2025 | 10:42
Համաձայնագիրը խաղաղության հիմքն է, եթե կա բարի կամք և փոխադարձ հարգանք. իսպանացի պատգամավորը՝ Երևան-Բաքու երկխոսության մասին
Սերգեյ Սկրիպալի և նրա դստեր թունավորումը կդիտարկենք որպես ՌԴ քաղաքացիների դեմ մահափորձ, եթե բրիտանական կողմը հակառակը չապացուցի. ՌԴ ԱԳՆ հայտարարությունը
Քաղաքականություն
28.03.2018 | 15:32
ՌԴ ԱԳՆ-ն գտնում է, որ բրիտանական իշխանությունները շահագրգռված չեն Սոլսբերիի հանցագործության իրական շարժառիթները պարզաբանելու համար, ինչը տեղիք է տալիս ենթադրելու, որ գործում ներգրավված են Բրիտանիայի հատուկ ծառայությունները. փոխանցում է interfax.ru-ն:
Բացի այդ, Ռուսաստանի արտաքին քաղաքական գերատեսչությունը հայտարարել է, որ Բրիտանիայում ռուսաստանցի նախկին հետախույզ Սերգեյ Սկրիպալի և նրա դստեր թունավորումը կդիտարկի որպես ՌԴ քաղաքացիների դեմ մահափորձ, եթե բրիտանական կողմը հակառակը չապացուցի:
«Եթե ռուսական կողմին չտրամադրվեն հակառակը հիմնավորող համոզիչ ապացույցներ, ապա կհամարենք, որ մեր համաքաղաքացիների դեմ մահափորձ է կատարվել՝ քաղաքական խոշոր սադրանքի արդյունքում: Ընդգծում ենք, որ ապացուցման բեռն ընկած է հենց բրիտանական կողմի վրա»,- ասված է գերատեսչության մեկնաբանությունում:
Հիշեցնենք, որ մարտի 5-ին Սոլսբերի քաղաքի ոստիկանությունը հաղորդել էր, որ քաղաքի առևտրի կենտրոններից մեկում անհայտ ծագման վտանգավոր նյութից անգիտակից վիճակում հիվանդանոց է տեղափոխվել երկու անձ։ Հետագայում պարզվել է, որ խոսքը Սկրիպալի և նրա դստեր մասին է:
Նշենք նաև, որ Սկրիպալը Ռուսաստանում 2006 թվականին դատապարտվել էր Մեծ Բրիտանիայի օգտին լրտեսելու համար, իսկ 2010 թվականին ապաստան էր ստացել Մեծ Բրիտանիայում. նրան փոխանակել են ԱՄՆ-ում ձերբակալված ռուս գործակալների հետ:
Աղմկահարույց այս դեպքին հաջորդեց Միացյալ Թագավորության վարչապետ Թերեզա Մեյի հայտարարությունն առ այն, որ ՄԹ-ից կատաքսվի ՌԴ 23 դեսպան: Մեծ Բրիտանիայի այս որոշմանը սատարեցին 27 երկրներ՝ իրենց երկրներից ռուս դիվանագետների արտաքսելով: Դիվանագետների վտարման արշավին այսօր միացավ նաև ՆԱՏՕ-ն:
