07.11.2024 | 21:14
Կալիֆորնիայում տարհանում է սկսվել 5,6 հազար հա տարածքում բռնկված հրդեհի պատճառով
Ալիևը մեկնաբանել է «Պանդորայի փաստաթղթերում» իր ու ընտանիքին առնչվող կոռուպցիոն գործարքների մասին տեղեկությունները
Քաղաքականություն
13.10.2021 | 22:33
Ադրբեջանի նախագահ Իլհամ Ալիևը մեկնաբանել է «Պանդորայի փաստաթղթերում» իր ու իր ընտանիքի անդամներին վերաբերող տեղեկությունները, ըստ որի՝ Ալիևներն օֆշորային ընկերությունների մեծ ցանց են կառավարում, ինչպես նաև Մեծ Բրիտանիայի մայրաքաղաք Լոնդոնում ապօրինաբար բազմամիլիոնանոց անշարժ գույք են ձեռք բերել։
Ալիևն ասել է, որ իր բոլոր բիզնեսները փոխանցել է երեխաներին, որոնք էլ շարունակում են դրսում ներդրումներ կատարել։
«Ես նախագահ եմ 18 տարի։ Նախկինում ես ձեռնարկատեր էի, զբաղվում էի բիզնեսով։ Ես հաջողակ ձեռնարկատեր էի։ Երբ ինձ նախագահ ընտրեցին, ես աղքատ մարդ չէի։ Դառնալով նախագահ՝ ես դադարեցի զբաղվել բիզբեսով ու այն փոխացեցի իմ ընտանիքին։
Դուք երևի հասկանում եք, որ ի տարբերություն Արևմուտքի մարդկանց, որոնք իրենց ժառանգությունը թողնում են իրենց շներին ու կատուներին, Ադրբեջանում մենք ընտանեկան արժեքները հարգում ենք»,- ասել է Ալիևը La Repubblica-ի հետ հարցազրույցում։
Նա նշել է, որ իր երեխաները հիմնականում ներդրումներ են կատարում Ադրբեջանում։
«Նրանք ներդրումներ ունեն նաև Ադրբեջանից դուրս։ Նրանց ամբողջ բիզնես գործունեությունը թափանցիկ է ու միջազգային աուդիտ է անցնում, ոչ ոք չի կարող պնդել, որ այստեղ մի բան այն չէ»,-ասել է Ադրբեջանի նախագահը՝ հավելելով, որ անձամբ չի կարդացել «Պանդորայի փաստաթղթերը»։
«Ինձ տեղեկատվություն են ներկայացրել, հնարավոր է ճշմարտությունն այնտեղ ընդամենը 5 տոկոս է, մնացյալը՝ սուտ է»,- ասել է Ալիևը։ Նա պնդել է, որ այդ հրապարակումն ու դրա շուրջ աղմուկն Ադրբեջանի դեմ հերթական «զրպարտչական արշավն է»։
Հավելենք, որ Իլհամ Ալիևն ու իր ընտանիքի անդաները բազմիցս են հայտնվել են կոռուպցիոն սկանդալների կիզակետում։ Վերջերս Իլհամ Ալիևի հորեղբոր՝ Ջալալ Ալիևի դուստր Իզզաթ Խանիմ Ջավադովան (նաև ներկայանում է որպես DJ Միքայելա Ջավ) և նրա ամուսինն էին Լոնդոնում հայտնվել կոռուպցիոն սկանդալի մեջ։
Բրիտանական դատարանը նրանցից 4 մլն ֆունտ էր գանձել՝ ապօրինաբար Մեծ Բրիտանիա գումարներ բերելու համար։
Ամուսինները ընդունել էին, որ գումարներ էին բերել անօրինական ճանապարհով՝ «ադրբեջանական լվացաքատան» միջոցով։
Էմմա Չոբանյան
