19.05.2026 | 13:20
Էդուարդ Սպերցյանը խոսել է մեջքի խնդիրների մասին
Լյուքս դասի ավտոշարասյուն և 35․000 դոլարանոց ժամացույց․ էրդողանին ու կնոջը մեղադրում են չափազանց շքեղության համար
Քաղաքականություն
21.09.2021 | 23:31
Թուրքիայի նախագահ Ռեջեփ Թայիփ Էրդողանն ու նրա կինը՝ Էմինե Էրդողանը, շքեղության ու անհարկի ծախսերի համար կրկին հայտնվել են քննադատությունների թիրախում։ Մասնավորապես, Նյու Յորք այցի ընթացքում Էրդողանի ավտոշարասյունը ներառել է տասնյակ շքեղ մեքենաներ, որը բնորոշ է իշխող «Արդարություն ու զարգացում» կուսակցությանն ու նախագահի չափից դուրս մեծ ծախսերին, գրում է Duvar-ը։
Նախօրեին Էրդողանին Նյու Յորքում նկատել են ավտոշարասյամբ՝ «Մերսեդես» մակնիշի մեքենաներով, ավտոբուսներով և շտապօգնության մեքենայով։
Այս ամենը քննարկումների ալիք է բարձրացրել սոցիալական ցանցերում։ Էրդողանը հաճախ է երթևեկում շքեղ ավտոշարասյուներով, որոնք, ինչպես ենթադրվում է, արտացոլում է նրա կառավարությանը բնորոշ անիմաստ ծախսերը։ Նշվում է, որ 2021 թվականի ֆինանսական տարում նման ծախսերի համար հատկացվել է 9․8 մլրդ լիրա, սակայն օգոստոսին վերջի տվյալներով՝ ծախսերը հասել են 83 մլրդ լիրայի սահմանը։
Բացի այդ, քննադատությունների կենտրոնում է հայտնվել նաև Թուրքիայի առաջին տիկինը՝ Էմինե Էրդողանը։ Մասնավորապես, IYİ՝ «Լավ» կուսակցության փոխնախագահ Ահմեդ Էրոզանը պնդում է, որ Էմինե Էրդողանը նախորդ՝ Եթովպիա կատարած այցի ժամանակ կրել է առնվազն 30․000 եվրո (շուրջ 35․000 դոլար) արժողությամբ ժամացույց:
Էրոզանը նման հայտարարություն է արել այն բանից հետո, երբ տարածվել է լուսանկար, որում Էմինե Էրդողանը կրում է այդ ժամացույցը՝ փորձելով գովազդել իր նոր գիրքը՝ «Իմ ճանապարհորդությունը Աֆրիկա»։ Պատգամավորը նշում է, որ ժամացույցը Chopard’s Happy Diamonds շքեղ ապրանքանիշի շարքից է:
«Chopard Happy Diamonds ձեռքի ժամացույցը ներդաշնակ է Աֆրիկայի աղքատությանը: Եթե նրա ձեռքի ժամացույցը կեղծ չէ, ապա դրա գինը սկսվում է 30․000 եվրոյից», -թվիթերյան իր էջում գրել է Էրոզանը:
Թուրքիայի առաջին տիկինն Աֆրիկա ճանապարհորդությունների մասին իր գիրքն առաջին անգամ ներկայացրել է սեպտեմբերի 20-ին Նյու Յորքում բացված «Թուրքական տանը»։
Չնայած Էմինե Էրդողանը պնդում է, որ ապրում է հասարակ կյանքով ու մահմեդական արժեքներով, հայտնի է իր բավական թանկարժեք հագուկապով։ 2019 թվականին էլ նա նման քննադատությունների թիրախում էր հայտնվել՝ ամուսնու հետ Ճապոնիա կատարած այցի ժամանակ 50․000 դոլար արժողությամբ Hermes պայուսակ կրելու համար։
Ի դեպ, Թուրքիայի նախագահն իր հերթին Նյու Յորքում ներկայացրել է իր հեղինակած «Ավելի արդար աշխարհ հնարավոր է» գիրքը։
Էմմա Չոբանյան
