05.01.2025 | 21:53
Մատուցվեց Սուրբ ծննդյան ճրագալույցի պատարագ․ ԼՈՒՍԱՆԿԱՐՆԵՐ
1.500.000 ՀՀ դրամ կաշառք ստանալու համար մեղադրանք է առաջադրվել հարկային տեսուչներին. քրգործի նախաքննությունն ավարտվել է
Հասարակություն
14.09.2021 | 16:10
ՀՀ ազգային անվտանգության ծառայությունում հարուցված և ՀՀ հատուկ քննչական ծառայությունում քննված քրեական գործի նախաքննությամբ բացահայտվել է ՀՀ ՊԵԿ գլխավոր հարկային տեսուչների կողմից տնտեսվարողից շորթմամբ առանձնապես խոշոր չափերի` 1.500.000 ՀՀ դրամ կաշառք ստանալու դեպք:
Մասնավորապես, պարզվել է, որ Տիգրան Ավետիքյանը և Վարդան Աղազարյանը, զբաղեցնելով ՀՀ ՊԵԿ ՀՎԸՀ հարկային տեսչություն-վարչության ընթացիկ հսկողության տարածքային (Արարատի) բաժնի գլխավոր հարկային տեսուչի պաշտոնները, նախնական համաձայնության գալով միմյանց հետ, շորթմամբ առանձնապես խոշոր չափերով կաշառք ստանալու դիտավորությամբ 2021 թվականի հուլիսի 16-ին այցելել են անհատ ձեռնարկատեր Ս. Գևորգյանի՝ Մասիս քաղաքում գործող խանութ և տնտեսվարողի կողմից թույլ տրված ենթադրյալ խախտումները հարկային օրենսդրությամբ սահմանված կարգով չարձանագրելու համար նրանից անձամբ պահանջել են առանձնապես խոշոր չափերով՝ 1.500.000 ՀՀ դրամ կաշառք: Հարկային տեսուչները սպառնացել են կաշառք չտալու դեպքում Ս. Գևորգյանի նկատմամբ քրեական հետապնդում իրականացնել և վերջինիս քրեական պատասխանատվության ենթարկել, որից հետո նա հարկադրված խոստացել է կաշառք տալ հիշյալ պաշտոնատար անձանց:
Տ. Ավետիքյանը և Վ. Աղազարյանը 2021 թվականի հուլիսի 30-ին Ս. Գևորգյանից շորթմամբ ստացել են պահանջված կաշառքի գումարից 1.200.000 ՀՀ դրամը` միաժամանակ պայմանավորվելով մնացած` 300.000 ՀՀ դրամը ստանալ հետագայում, սակայն իրականացված օպերատիվ-հետախուզական միջոցառումների արդյունքում բռնվել են ՀՀ ԱԱԾ աշխատակիցների կողմից:
Վերը նշված հանցավոր արարքների կատարման համար Տիգրան Ավետիքյանին և Վարդան Աղազարյան մեղադրանք է առաջադրվել ՀՀ քրեական օրենսգրքի 311-րդ հոդվածի 4-րդ մասի 2-րդ կետով: Նրանց նկատմամբ որպես խափանման միջոց է ընտրվել կալանավորումը:
Նախաքննությունն ավարտվել է: Քրեական գործը մեղադրական եզրակացությամբ ուղարկվել է դատախազին` այն հաստատելու և դատարան ուղարկելու միջնորդությամբ:
