«Ելքը» դեմ է քվեարկելու բյուջեի կատարողականին. Դավիթ Խաժակյան

Երևանի ավագանու «Ելք» խմբակցությունն այսօր ավագանու նիստում դեմ քվեարկեց օրակարգում ընդգրկված Երևանի զարգացման ծրագրին և բյուջեի կատարողականին։
Այս մասին ավագանու նիստի ընթացքում հայտարարեց խմբակցության ղեկավար Դավիթ Խաժակյանը։

«Այսօր Երևանում շարունակաբար շահագործման են հանձնվում բարձրահարկ և մեծածավալ շենքեր, որոնք կառուցվել են ի հաշիվ հին Երևանի շենքերի և կառուցվել են ֆասադների վրա։ «Պահպանելով հինը, կառուցենք նորը» ցինիկ կարգախոսի ներքու հին Երևանից մնում է միայն ֆասադը, իսկ վրան կառուցվում է ոչ ժամանակակից և ոչ հնաոճ մի կառույց, որը հնի հետ համեմատության մեջ հիշեցնում է հրեշի»,-ասաց ԽաԺակյանը։

Վերջինիս խոսքով՝ Երևանի յուրաքանչյուր քաղաքապետ, որպես սուրբ պարտականություն, վաճառել է հին շենքերը, կամ՝ թույլ տվել ձևախեղումներ, իսկ ձեռնարկատերերն, ովքեր ներդրումներ են կատարել, քաղաքային կոլորիտի զարգացման գիտակներ չեն եղել․«Գուցե ներդրողները չունեն քաղաքի կոլորիտի առաջնահերթություն, բայց քաղաքային իշխանությունների համար դա պետք է լիներ առաջնահերթություն, և, ինչպես ասում է ճարտարապետ Արթուր Մեսչյանը, բուլդոզերների ժամանակը գալու է, սակայն, ցավալի է, որ այդ ժամանակ բազմաթիվ շենքեր էլ չեն լինելու»։

Երևանի ավագանու «Ելք» խմբակցության ղեկավարն անդրադարձավ նաև «Ավելի լավ Երևան» նախագծին և նշեց, որ մինչ օրս քաղաքաապետարանն իրականություն չի դարձրել այս նախագծով նախատեսված ծրագրերը, որոնցից են՝ կանաչ տարածքների վերականգնումը, աղբի վերամշակման գործարանի հիմնումը, վերգետնյա նոր երթուղային ցանցի ստեղծումը։

Մանրամասները՝ տեսանյութում