19.12.2025 | 21:41
Հայաստանը Ժնևում քննարկել է փախստականների խնդիրների հասցեագրման իր մոտեցումները
Ամենակարևորն այն է՝ կա հաստատակամություն, որ ԵԱՀԿ ՄԽ-ն վերսկսի աշխատանքը․ Դավիթ Բաբայանը՝ ռուսաստանցի համանախագահի Ստեփանակերտ չայցելելու մասին
Քաղաքականություն
07.09.2021 | 15:57
Արցախում շատ են կարևորում ԵԱՀԿ Մինսկի խմբի ռուսաստանցի նոր համանախագահ Իգոր Խովաևի հետ հանդիպումը Երևանում։ Factor.am-ի զրույցում այս մասին ասաց Արցախի Հանրապետության ԱԳ նախարար Դավիթ Բաբայանը։
«Մնացած հարցերը երկրորդական են և ոչ կարևոր»,- հավելեց նա՝ պատասխանելով հարցին, թե ինչպես են գնահատում այն, որ ՄԽ նորանշանակ համանախագահը Ստեփանակերտ չի այցելել և իրենց հետ այնտեղ չի հանդիպել։
«Մենք շատ կարևորում ենք նման այցերն ու հանդիպումները։ Ծրագրվում է նաև ԵԱՀԿ Մինսկի խմբի ամբողջական կազմի տարածաշրջանային այցը։ Ամենակարևորն այն է, որ կողմերը դեմ չեն, և կա հաստատակամություն, որ ԵԱՀԿ Մինսկի խումբը վերսկսի աշխատանքները։ Սպասում ենք կառույցի աշխատանքի և խաղաղ բանակցային գործընթացի վերսկսելուն»,- ասաց պաշտոնյան։
Դավիթ Բաբայանի խոսքով՝ իրենք համարում են, որ հակամարտության գլխավոր կողմերը Արցախն ու Ադրբեջանն են, համախանագահությունն էլ ամեն ինչ անում է՝ հակամարտությունը կարգավորելու համար։
«Պետք է սպասենք, տեսնենք։ Թող եռանախագահությունը վերսկսի իր աշխատանքները, մնացածը ցույց կտա ժամանակը։ Մենք կողմնակից ենք, որ ԵԱՀԿ Մինսկի խմբի եռանախագահության ներքո ընթանան բանակցությունները, հակամարտության կարգավորումը»,- ասաց նա։
Ըստ Բաբայանի՝ ակնկալում են, որ Արցախի հետ եռանախագահության աշխատանքի ոճը չի փոխվի, կլինի այնպիսին, ինչպիսին եղել է նախկինում․ «Պետք է ամեն ինչ արվի, որ տարածաշրջանում խաղաղությունն ու կայունությունը պահպանվեն, քայլեր ձեռնարկվեն համապարփակ կարգավորման ուղղությամբ»։
Հիշեցնենք, որ Արցախի Հանրապետության նախագահ Արայիկ Հարությունյանը սեպտեմբերի 6-ին Երևանում հանդիպել է ԵԱՀԿ Մինսկի խմբի ռուսաստանցի համանախագահ Իգոր Խովաևի հետ:
Տարածված հաղորդագրության համաձայն՝ հանդիպմանն Արայիկ Հարությունյանն ընդգծել է, որ Արցախը շարունակում է հավատարիմ մնալ ԵԱՀԿ Մինսկի խմբի ձևաչափով բանակցային գործընթացը շարունակելու հանձնառությանը: Քննարկվել են ադրբեջանա-ղարաբաղյան հակամարտությանն առնչվող տարբեր հարցեր, ինչպես նաև շեշտվել է համանախագահների՝ առաջիկայում տարածաշրջան կատարելիք այցի կարևորությունը։ Հանդիպմանը մասնակցել են նաև ԱՀ արտաքին գործերի նախարար Դավիթ Բաբայանը, պաշտոնատար այլ անձինք:
Նշենք նաև, որ մինչ Երևան այցը Իգոր Խովաևը եղել է Բաքվում։
Հռիփսիմե Հովհաննիսյան
