15.11.2024 | 21:20
Խիստ հակասական COP29. մասնագետները կլիմայի շուրջ բանակցություններն այլևս արդյունավետ չեն համարում
Երևանի ավագանու նիստերը չեն կարող դռնփակ լինել. Արման Թաթոյան
Հասարակություն
14.03.2018 | 15:43
Երևանի ավագանու նիստերը չեն կարող դռնփակ լինել: Լրագրողների հետ զրույցում այս մասին հայտարարեց Մարդու իրավունքների պաշտպան Արման Թաթոյանը:
«Ինչ կարգավորում էլ, որ լինի, չի կարող խոչընդոտել լրագրողի աշխատանքին: Միտում է նկատվում լրագրողին պետական համակարգից օտարացնելու, սա վտանգավոր ընկալում է, որը չպետք է թողնենք՝ ձևավորվի»,- ասաց Թաթոյանը՝ նկատելով, որ լրագրողին երբեք չպետք է ընկալել որպես բարիկադի հակառակ կողմում գործող անձ:
Լրագրողների հարցին՝ նույն մտահոգությունը կա՞ կառավարության նիստերը դռնփակ անցկացնելու հետ կապված, օմբուդսմենը պարզաբանեց. «Կառավարության նիստերի հետ կապված՝ մենք իրականացրել ենք միջազգային փորձի ուսումնասիրություն: Երկրների ճնշող մեծամասնության դեպքում նիստերը դռնբաց չեն, կա նաև միջազգային տարբեր կազմակերպությունների գնահատական, սակայն այդ նույն կազմակերպությունները հաճախ զգուշացնում են պետություններին, որ անհրաժեշտ է մշակել հատուկ ֆորմատներ՝ լրագրողների հետ շփվելու»:
ՄԻՊ-ը մատնանշում է երկրներ, որոնք դռնփակ նիստերի պարագայում կազմակերպում են ճեպազրույցներ լրագրողների հետ: «Կառավարության նիստերը դռնփակ անելն այլ բան է, իսկ Երևանի ավագանու դեպքում բոլորովին այլ սկզբունքներ են գործում: Գործադիր իշխանությունն այլ է, բայց քաղաքապետարանը ներկայացուցչական մարմին է, այնտեղ անձինք են, որոնք ընտրվել են ժողովրդի կողմից, ինչպես, օրինակ, խորհրդարանը»,- հավելեց Արման Թաթոյանը:
Հիշեցնենք՝ Երևանի ավագանու «Երկիր Ծիրանի» խմբակցության անդամների կողմից կազմակերպված հայտնի ակցիայից և դրան հաջորդող զարգացումներից հետո, քաղաքապետ Տարոն Մարգարյանը հանձնարարեց աշխատակազմին լրագրողների աշխատանքը կանոնակարգելու առնչությամբ առաջարկներ ներկայացնել: Քաղաքապետի այս հանձնարարականի արդյունքում առաջիկայում հնարավոր է՝ արգելվի լրագրողների մասնակցությունը ավագանու նիստերին:
