16.12.2025 | 17:51
Բերդ քաղաքի որոշ հասցեներում ջուր չի լինի
Սերժ Սարգսյանն ինքն է հրաժարվել առանձնատնից, երբ դուք իշխանություն չէիք. Արծվիկ Մինասյան․ ՏԵՍԱՆՅՈւԹ
Քաղաքականություն
12.08.2021 | 17:10
Երբ առաջարկվում է կառավարական ամառանոցը որպես պետական սեփականություն առավել արդյունավետ օգտագործելու առումով տրամադրել զինվորների վերականգնողական կենտրոնին, միանգամից ջղաձգումներ են առաջանում։ Այս մասին այսօր՝ օգոստոսի 12-ին, ԱԺ-ում հայտարարեց «Հայաստան» խմբակցության պատգամավոր Արծվիկ Մինասյանը։
«Անգամ եթե նախկինում սխալ ենք արել և չենք առաջարկել, դա չի նշանակում, որ հիմա նման ջղաձգումներ պետք է առաջանան։ Հանրային սեփականության կառավարման մասին է խոսքը: Ասում եք՝ այլ հարմար հնարավորություններ կան. խնդիր չէ, քննարկենք, բայց նման ջղաձգումներով արձագանքը բացարձակ տեղին չէ»,- ասաց նա։
Արծվիկ Մինասյանը ԱԺ փոխխոսնակ Ռուբեն Ռուբինյանին հիշեցրեց, որ պաշտոնաթող նախագահներին սոցիալական պաշտպանության շրջանակներում ցուցաբերվող պետական օժանդակության մասին օրենքն ընդունվել է 1996 թվականի փետրվարի 19-ին:
Հիշեցնենք՝ Ռուբինյանը կարծիք էր հայտնել, թե նախկինում ՀՅԴ-ն և Մինասյանը դեմ չեն եղել, որ երրորդ նախագահ Սերժ Սարգսյանին տուն տրամադրվի կառավարական ամառանոցից։
«Այո, ես կառավարության անդամ եմ եղել և առնչվել եմ այդ հարցին,- նշեց Մինասյանը: -Երբ նախագահը Լևոն Տեր-Պետրոսյանն էր, ՀՅԴ-ի գործունեությունն ապօրինաբար կասեցված էր, և եթե պահանջ ունեք ներկայացնելու, թե ինչու է այս օրենքն ընդունվել, արդեն պարզ է, թե ում պետք է այն ներկայացնեք։
Այս օրենքի կատարման ապահովման շրջանակում մինչև 2018թ․ մարտի 7-ը, երբ ձեր կողմից հնարավոր իշխանափոխության մասին խոսք չկար, այս օրենքում շատ փոփոխություններ են կատարվել։
2018թ․-ին, երբ այդ առանձնատունը հատկացվում էր Սերժ Սարգսյանին, ապրիլի 19-ի կառավարության հենց առաջին նիստի ժամանակ Սերժ Սարգսյանը հրաժարվել էր դրանից։ Դուք այդ ժամանակ չկայիք, իշխանափոխություն չկար, դուք իշխանություն չէիք: Սա է ճշմարտությունը, ես փաստերով եմ խոսում։ Այո, գուցե հանրային տրամադրություններն ազդեցին, բայց մի՛ ասեք՝ թե ձեր իշխանության գալով եղավ այդ ամեն ինչը:
Ի վերջո, պետության պարտավորությունն է պաշտոնաթող նախագահին անհրաժեշտ տարածքով ապահովելը։ Սա բոլոր նախագահներին է վերաբերում։ Իսկ դուք նայեք, թե ձեր օրոք ինչ արտոնություններ եք սահմանել վարչապետի համար»,- ասաց Մինասյանը:
Մանրամասները՝ տեսանյութում:
