Վարչապետի հետ քաղաքական մրցակիցներ ենք, բայց պետականությունը պետք է փրկել․Խզմալյանը՝ հանդիպման մասին. ՏԵՍԱՆՅՈՒԹ

Վարչապետի պաշտոնակատար Նիկոլ Փաշինյանի նախաձեռնությամբ տեղի է ունեցել արտախորհրդարանական ուժերի հետ առաջին խորհրդակցական հանդիպում:

Հայաստանի Եվրոպական կուսակցության նախագահ Տիգրան Խզմալյանը Factor.am-ի հետ զրույցում նշեց. «Ստեղծվում է մի նոր ձևաչափ, որը կոչված է ոչ միայն խորհրդակցություններ կազմակերպելու համար: Վարչապետի հետ և միմյանց հետ մենք քաղաքական մրցակիցներ ենք, բայց մեզ միավորում է պատասխանատվության զգացումը և ցանկությունը՝ պետականությունը պետք է փրկել, պետությունը պետք է վերականգնվի:

Մենք ելնում ենք նրանից, որ պետք է լինենք անկեղծ… Մենք կարողանում ենք ոչ թե միայն վիճաբանել՝ միմյանց հրելով և մեր կարծիքը պնդելով, այլ կարողանում ենք բանավեճ կազմակերպել, լսում ենք միմյանց, և դա ամենաթանկն է:

Որպես Եվրոպական կուսակցության ներկայացուցիչ՝ ես պնդում եմ մեր ռազմավարական նպատակները՝ եվրաինտեգրում, աշխարհաքաղաքական վեկտորի փոփոխություն: Մենք հրապարակախոսային դաշտից տեղափոխվել ենք քաղաքական դաշտ: Եվ սա շատ մեծ ձեռքբերում է. ստեղծվեց նոր հարթակ, որտեղ վերականգնվեց ժողովրդավարական գործընթաց Հայաստանում:

Կարելի է համարել, որ երկխոսությունը սկսված է, և ամենակարևորն արդեն ասված է, առաջիկայում լինելու է սրա քննարկումը, մշակումը և խորացումը:

Եթե դիտարկենք, թե որ արտախորհրդարանական ուժերն են համաձայնել աշխատել գործադիրի հետ, կտեսնենք, որ մեծամասնությունը ժողովրդավարական թևն է: Գործող անձինք ռուսական սրի տակ չեն անցել և չեն պատրաստվում անցնել, առավել ևս երբ աշխարհաքաղաքական զարգացումները մեզ տանում են ուրիշ ուղղությամբ»:

Մանրամասները՝ տեսանյութում: