15.02.2026 | 19:50
ԱՄՆ-ը կասկածի տակ չի դնում եվրոպական երկրների եզրակացությունները Նավալնիի էպիբատիդինով թունավորման վերաբերյալ․ Մարկո Ռուբիո
Բաքվում կրկին հետաձգվել է շիրակցի ռազմագերիների շինծու քրգործով դատական նիստը
Քաղաքականություն
16.07.2021 | 14:18
Բաքվում այսօր նշանակված շիրակցի 13 ռազմագերիների նկատմամբ հարուցված շինծու քրեական գործով դատական նիստը հետաձգվել է։
Ադրբեջանական լրատվամիջոցների հաղորդմամբ՝ դատավոր Էլդար Իսմայիլովը հայտարարել է, որ փաստաբան Էլմիրա Իսմայիլովան նամակ է ուղարկել դատարանին ու հայտնել, որ չի կարող նիստին մասնակցել առողջական խնդիրների պատճառով։ Դատավորը նշել է, որ փաստաբանի բացակայության պայմաններում անհնար է նիստ անցկացնել։ Հաջորդ դատական նիստը նշանակվել է հուլիսի 22-ին։
Ավելի վաղ տեղական լրատվամիջոցները հայտնել էին, որ այսօրվա նիստում սպասվում է գործի փաստաթղթերի ուսումնասիրություն և դատաքննության ավարտ։
Շիրակցի 13 ռազմագերիներն են՝ Հայկազ Հովհաննիսյանը, Վարազդատ Մանուկյանը, Դավիթ Ստեփանյանը, Լևոն Թոսունյանը, Արթուր Բաղդասարյանը, Սերոբ Ավագյանը, Վարազդատ Հարությունյանը, Ժորա Մանուկյանը, Հրայր Հերաբյանը, Նարեկ Գասպարյանը, Գրիգոր Կյուրեղյանը, Աշոտ Գևորգյանը, Մարտին Աղրամանյանը։
Հայ գերիների այս խմբի շինծու գործով նախորդ դատական նիստը տեղի էր ունեցել հուլիսի 2-ին։ Բաքուն հայ ռազմագերիների նկատմամբ քրեական գործեր է հարուցել՝ ահաբեկչություն, դիվերսիա և այլ հանցագործություններ կատարելու մեղադրանքով։
Նշենք, որ վերջին շրջանում մեկը մյուսի հետևից հետաձգվում են շիրակցի ռազմագերիների շինծու քրեական գործերով դատական նիստերը, բոլոր դեպքերում՝ փաստաբանի բացայակության պատրվակով։
Էմմա Չոբանյան
