11.10.2026 | 11:22
Երևանի 4 վարչական շրջաններում և Արարատի մարզի գյուղերում մինչև 36 ժամ ջուր չի լինի
ՌԴ քաղաքացուն, որին Բաքուն մեղադրում է պատերազմում հայկական կողմից մասնակցելու մեջ, սպառնում է 11 տարվա ազատազրկում
Քաղաքականություն
14.07.2021 | 20:28
Բաքվի ծանր հանցագործությունների դատարանում այսօր շարունակվել է ՌԴ քաղաքացի Էդուարդ Դուբակովի նկատմամբ հարուցված շինծու քրեական գործով հերթական դատական նիստը։
Նշենք, որ պաշտոնական Բաքուն Դուբակովին մեղադրում է Արցախյան երկրորդ պատերազմին հայկական կողմից մասնակցելու մեջ՝ նրան համարելով «վարձկան»։
Դատական նիստն ընթացել է դատավոր Սամիր Ալիևի նախագահությանբ։ Ադրբեջանական «Ապա»-ի հաղորդմամբ՝ դատաքննությունն ավարտվել է։ Դատախազը պահանջել է Դուբակովին դատապարտել 11 տարվա ազատազրկման ընդհանուր ռեժիմի գաղութում։ Բացի այդ, դատախազը նաև նշել է, որ պատժի կրումից հետո Դուբակովը պետք է երկրից վտարվի։
Այնուհետև ելույթ է ունեցել մեղադրյալի փաստաբանը։ Իր խոսքում նա ասել է, որ «Դուբակովը մասնակցել է Հայաստանի կողմից Ադրբեջանի օկուպացված տարածներում զորավարժությունների, սակայն չի կռվել Ադրբեջանի ԶՈՒ-ի դեմ», և խնդրել դատարանին սա մեղմացուցիչ հանգամանք դիտարկել։
Դատարանը ժամանակ է տվել Դուբակովին՝ վերջին խոսքին պատրաստվելու համար։ Հաջորդ նիստը տեղի կունենա հուլիսի 22-ին։
Նշենք, որ ըստ մեղադրական եզրակացության՝ Էդուարդ Դուբակովն անօրինական կերպով այցելել է «Ադրբեջանի օկուպացված տարածքներ ու մասնակցել ռազմական գործողությունների Քարվաճառի շրջանում։ Ապա այս տարի հունվարի 14-ին Թուրքիայից ժամանել է Բաքու՝ ահաբեկչական գործողություն իրականացնելու համար»։
Բաքուն ՌԴ քաղաքացի Էդուարդ Դուբակովի նկատմամբ քրեական գործ է հարուցել 214․-3․1 (ահաբեկչություն, ահաբեկչության ֆինանսավորում), 218․2 (մասնակցություն հանցավոր կազմակերպությանը, խմբավորմանը), 318․2 (պետական սահմանի անօրինական հատում) հոդվածներով։
Նախորդ՝ հուլիսի 7-ին կայացած նիստում Դուբակովը հերքել է բոլոր մեղադրանքները՝ նշելով, որ դրանք շինծու են։ Նա ասել է, որ խոստովանական ցուցմունք է տվել ճնշումների պատճառով։ Դուբակովը նաև հայտարարել է, որ 2018 թվականին Բելառուսում հավաքագրվել է Ադրբեջանի հատուկ ծառայությունների կողմից և այցելել Արցախ հենց նրանց հանձնարարությամբ։ Դուբակովի խոսքով՝ 2021 թվականի հունվարին իրեն կանչել են Բաքու՝ դրամական պարգևատրման և նոր հանձնարարություններ տալու համար, սակայն ձերբակալել են։
Էմմա Չոբանյան
