16.12.2025 | 13:20
Թրամփը դատի է տվել BBC-ին` պահանջելով 5 մլրդ դոլար
Այն ամենն, ինչ պետք է իմանալ նախագահի պաշտոնին հակասահմանադրական ճանապարհով հավակնող Արմեն Սարգսյանի մասին. փաստաբան
Հասարակություն
01.03.2018 | 16:35
Փաստաբան Վահե Գրիգորյանը ֆեյսբուքի իր էջում հանրապետության նախագահի պաշտոնին հավակնող Արմեն Սարգսյանի՝ բրիտանական քաղաքացիություն ունենալու վերաբերյալ գրառում է կատարել:
Գրառումն ամբողջությամբ՝ ստորև.
ՀՀԿ խորհրդի նախագահի կողմից առաջադրած թեկնածու Արմեն Սարգսյանին ուղիղ հարց էր ուղղել պատգամավոր Ա. Զեյնալյանը՝ հարցնելով, թե երբ է Միացյալ Թագավորության պետական քարտուղարը գրանցել Ա. Սարգսյանի (իր պնդմամբ) 02/12/2011թ.-ին ՄԹ համապատասխան իշխանությանը ներկայացրած իր բրիտանական քաղաքացիությունից հրաժարվելու մասին հայտարությունը:
Որպեսզի ավելի պարզաբանեմ իրավիճակը ամենակենցաղային պարզության աստիճանի, ապա ընթացակարգն այսպիսին է. բրիտանական քաղաքացիությունից հրաժարվող անձը այդ մասին իր հայտարարությունը ներկայացնում է պետական քարտուղարին, որը դրա վրա որոշակի ընթացակարգի ապահովումից հետո գրանցում է դրա գրանցման ամսաթիվը և վերադարձնում է անձի դիմումի օրինակը՝ գրանցման նշումով: Ահա այս՝ գրանցված ամսաթիվը հենց բրիտանական քաղաքացիության դադարեցման ամսաթիվն է ըստ ՄԹ քաղաքացիության մասին օրենքի: Ա. Սարգսյանին ուղղված պարզ հարցին ի պատասխան, վերջինս դասը չսովորած աշակերտի խոսափողական պահվածքով ի վերջո չտվեց այս պարզագույն հարցի պատասխանը: Փոխարենը, այս հարցի պատասխանը վստահաբար ունի Հանրապետության ԱԱԾ-ն: Չէ՞ որ մարդը բարձր դիվանագիտական պաշտոն է զբաղեցնում, ինչպե՞ս կարող է պետությունն անտեսել նրա քաղաքաիրավական կապն այլ պետության հետ, նամանավանդ որ այդ այլ պետությունում նա հենց դեսպանն է:
Այս հարցի պատասխանը վստահաբար ունի նաև հանրապետության ոստիկանությունը և ԱԳՆ-ն: Այս հարցի պատասխանն, ի վերջո, ունի նաև ՀՀԿ-ական ամբողջ վերին Էշելեոնը: Եվ, բնականաբար, այս հարցի պատասխանն ունի նաև, իհարկե, Ա. Սարգսյանին իր պաշտոնում նշանակողը: Բայց այս ամենը դեռ մի կողմ: Այս հարցի պատասխանը, այսինքն՝ վաղը պետական գաղտնիքին մուտք ունեցող անձի և պետության գլխի համար ծայրահեղ զգայուն հարցի պատասխանն ունի ՄԹ ողջ կառավարությունը, և Հայաստանում այս պահին սույն պորցեսի նկատմամբ ուշադրությամբ հետևող բրիտանական հատուկ ծառայությունները: Այս հարցի պատասխանը բոլոր մանրամասներով կարող են ունենալ նաև բրիտանական հատուկ ծառայությունների գործընկեր մի շարք այլ պետությունների հատուկ ծառայություններ:
Հաշվի առնելով Ա. Սարգսյանի գործարար ակտիվության կենսական տարածքները ՌԴ և նախկին ԽՍՀՄ որոշ այլ պետություններ էին, այս հարցի պատասխանը բարձր հավանականությամբ ունեն նաև այդ պետությունների կառավարությունները: Այս հարցի պատասխանը չունեցավ միայն Հայաստանի Հանարպետության քաղաքացին:
Ահա այն ամենը, ինչ պետք է իմանալ հանրապետության նախագահի պաշտոնին հակասահմանադրական ճանապարհով հավակնող Ա. Սարգսյանի մասին: Սա պետք է հիշի հանրապեության քաղաքացին ամեն նրան բարևելուց առաջ: Եթե, իհարկե, բարևի այս ամենից հետո: Ես իմ համար այս հարցը փակված եմ համարում և ներողութուն եմ խնդրում այս օրով հանրային ուշադրությունը զբաղեցնելու համար:
