«Սեփականաշնորհումը փող հավաքելու միջոց չէ»․ Էդուարդ Շարմազանով

«Պետական գույքի մասնավորեցման 2017-2020 թվականների ծրագրի մասին» «Ելք» խմբակցության ղեկավար Նիկոլ Փաշինյանի ելույթից հետո, օգտվելով ԱԺ կանոնակարգ-օրենքի ընձեռած հնարավորություններից, արտահերթ ելույթով հանդես եկավ ԱԺ փոխնախագահ, ՀՀԿ խոսնակ Էդուարդ Շարմազանովը:

«Մի հարցի պետք է պատասխան տանք՝ մասնավորեցումը լա՞վ է, թե՞ վատ։ Այստեղ տարբեր գնահատականներ հնչեցին, ես մի բան եմ կարծում, որ չենք կարող միանշանակ ասել լավ է կամ վատ է։ Այսօրվա աշխարհում հաջողել են այն պետությունները, որտեղ մասնավորեցումն իրականացվել  է, բայց իրականացվել  է ճիշտ ձևով, ոչ թե վայրի մասնավորեցմամբ, հնարավոր է՝ ջարդելով տալիս են քեզ։ Մեր հարգարժան առողջապահության նախկին նախարարներից մեկն ասում էր մի առողջապահական հիմնարկ սարքենք  խորովածանոց, իհարկե, նման ռադիկալ մոտեցումներին դեմ ենք»,- ասաց նա։

Շարմազանովի խոսքով՝ մասնավորեցումն ապացուցել է իր արդյունավետությունը մրցունակ և ազատ շուկայական տնտեսության պայմաններում․ «Ընդամենը մի քանի օրինակ՝ հիշո՞ւմ եք «Զվարթնոց» օդանավակայանը մինչ մասնավորեցումը և հետո, հիշո՞ւմ եք բազում հիվանդանոցներ, և՛ դրական կողմեր ունենք և՛ բացասական, բայց այս փաթեթն առողջ տրամաբանությանն է վերաբերում»,- հայտարարեց ՀՀԿ խոսնակը՝ հավելելով, որ խորհրդարանի դերն էլ լինելու է առաջարկություններ ներկայացնելը և վերահսկողական գործառույթներ իրականացնելը։

«Սեփականաշնորհումը փող հավաքելու միջոց չէ, բացի փողից, իմ կարծիքով մասնավորեցումը արդյունավետ, մատչելի կառավարման խնդիր է լուծում»,- իր համոզմունքը հայտնեց Էդուարդ Շարմազանովը։ Անդրադառնալով առողջապահական ոլորտի՝ պատգամավորների հնչեցրած քննադատություններին, Շարմազանովն ասաց․ «Մեր խնդիրը մատչելի մրցակցային կառավարումն է, բարեկամներ, ուզում եմ ասել՝ օդից, միանգամից մոտեցումներին դեմ ենք, բայց եկեք ընդունենք, որ մասնավոր առողջապահական հիմնարկները ոչնչով չեն զիջում, եթե չասենք, որ ավելի մրցունակ են, ավելի որակյալ առողջապահություն են մատուցում, քան պետականները»,- ասաց նա, ապա դիմելով Նիկոլ Փաշինյանին, որն էլ բարձրացրել էր այս հարցը, ասաց․ «Պարոն Փաշինյան, դուք ճիշտ եք այստեղ բազում խնդիրներ ունենք, համոզված եմ, որ առաջիկայում առողջապահության նախարարը հյուրընկալվի ԱԺ-ում և նաև պոլիկլինիկաների հետ կապված սրտացավ, ինչու չէ թեժ լսումներ կանցկացնենք։ Սա չի արվում փող վերցնելու, սրան-նրան նվիրելու համար, այլ մրցակցային դաշտ ապահովելու համար»։

Սեդա Ղուկասյան