«Այ քեզ բան». Բագրատյանին վրդովվեցրեց Փաշինյանի պարզաբանումը` Արցախը ճանաչելու մասին․ ՏԵՍԱՆՅՈՒԹ

«Արցախը չէիք ճանաչում, հարձակվեցին, Արցախից հիմա մնացել է 2,5 հազար քառ.կմ: Այնտեղ զինվոր գնալո՞ւ է, թե՞ չէ: Ես չեմ կարող արցախցուն ասել՝ գիտես ինչ, էսօր որ Արցախը ճանաչեմ, մեզ կտփեն: Այ քեզ բան, մեջք մեջքի պիտի տանք, դիմանանք: Արցախը ճանաչենք – չճանաչենք, մեր թշնամին աջից 10 միլիոն է, ձախից՝ 85 միլիոն:

Այ քեզ բան, Արցախը ճանաչել, նշանակում է բանակցությունների վե՞րջ, ո՞վ ասաց: Ես ճանաչում եմ, միջազգայի՛ն հանրություն, դու քո լուծումը տուր»,- Հանրային հեռուստաընկերության եթերում ընթացող նախընտրական բանավեճի շրջանակներում այս մասին նշեց «Ազատություն» կուսակցության նախագահ Հրանտ Բագրատյանը՝ անդրադառնալով ՀՀ վարչապետի պաշտոնակատար, «Քաղաքացիական պայմանագիր» կուսակցության վարչապետի թեկնածու Նիկոլ Փաշինյանի պարզաբանմանը՝ Արցախը ճանաչելու մասին:

Նշենք, որ Նիկոլ Փաշինյանը բանավեժի ընթացքում Արցախի ճանաչման հարցի վերաբերյալ նշել էր. «44-օրյա պատերազմից հետո հաճախ ընդդիմության ներկայացուցիչներն ինձ մեղադրում են, որ ես ասել եմ. «Արցախը Հայաստան է և վերջ»: Եթե իրենց տրամաբանությամբ այդ մի նախադասության պատճառով պատերազմ է սկսվել, բա Արցախը ճանաչելու դեպքում պատերազմ չէ՞ր սկվելու, բա հիմա, որ ասում են՝ Արցախը ճանաչենք, Արցախը ճանաչելու արդյունքում պատերազմ չի սկսվելո՞ւ: Ինձ համար ակնհայտ է, որ սա հստակ պատերազմի տանող դիրքորոշում է:

Այսօր էլ ես հայտարարել եմ, որ Արցախի հարցը, ինչպես ԵԱՀԿ Մինսկի խմբի համանախագահներն իրենց հայտարարությամբ նշել են, լուծված չէ, և պետք է լուծվի բանակցային գործընթացի լիարժեք վերականգնման միջոցով, և Հայաստանը ընդունում է ԵԱՀԿ Մինսկի խմբի համանախագահների առաջարկը՝ օր առաջ սկսել բանակցություններ Արցախի կարգավիճակի ճանաչման շուրջ, և մեր դիրքորոշումն է՝ Արցախի կարգավիճակի ճանաչման հիմքում պետք է դրվի «անջատում հանուն փրկության» սկզբունքը»: