07.12.2025 | 21:40
Վարդենյաց լեռնանցքում ձյուն է տեղում. Դիլիջանի, Սպիտակի ոլորաններում մառախուղ է
Սերժ Սարգսյանը հայտարարել է, որ անհետ կորածների թիվը 1064 է
Հասարակություն
16.06.2021 | 22:03
ՀՀ 3-րդ նախագահ Սերժ Սարգսյանի գրասենյակն այսօր փաստաթուղթ է հրապարակել, որում անդրադարձ կա Արցախյան երկրորդ պատերազմի հետևանքով հայկական կողմի անհետ կորածների թվին։ Փաստաթուղթն ուղղված է ՀՀ փոխվարչապետ Մհեր Գրիգորյանին և ՀՀ Աշխատանքի և սոցիալական հարցերի նախարար Մեսրոպ Առաքելյանին՝ Զինծառայողների ապահովագրության հիմնադրամի տնօրեն Վարուժան Ավետիքյանի կողմից, որում ներկայացված է Հիմնադրամի կողմից փաստացի կատարված ծախսերի վերաբերյալ հաշվետվությունը՝ մինչև 05.04.2021թ․-ի դրությամբ։
Երրորդ նախագահի գրասենյակը տարածած հաղորդագրությամբ ուշադրություն է հրավիրում այն հանգամանքի վրա, որ փաստաթղթում անհետ կորածների թիվը նշված է 1064, մինչդեռ Նիկոլ Փաշինյանն ԱԺ-ում հայտարարել է, որ անհետ կորածների թիվը 321 է։
Փաստաթղթի վերաբերյալ Factor.am-ը փորձեց տեղեկություն ստանալ Զինծառայողների ապահովագրության հիմնադրամի տնօրեն Վարուժան Ավետիքյանից: Նա նշեց, որ տեղյակ չէ՝ ինչ փաստաթղթի մասին է խոսքը և չի կարող մեկնաբանել: Հարցին՝ վերջին տվյալներով որքա՞ն է անհետ կորածների թիվը, Ավետիքյանը պատասխանեց, որ հիմնադրամը պարբերաբար հրապարակումներ է կատարում տրված հատուցումների վերաբերյալ:
«Մեր հրապարակումներում եղած տեղեկություններից բացի՝ այլ բան չեմ կարող ասել»,- հավելեց Ավետիքյանը:
Նշենք, սակայն, որ Զինծառայողների ապահովագրության հիմնադրամի հայտարություններում միայն ընդհանուր տվյալներ են ներկայացվում հատուցում ստացած շահառուների վերաբերյալ, անհետ կորած զինծառայողների վերաբերյալ տվյալներ չեն նշվում: Վերջին՝ հունիսի 11-ին տարածած հաղորդագրության համաձայն՝ Հիմնադրամի հիմնական շահառուների քանակը 3803 է, որից 416-ը Հիմնադրամի շահառու են դարձել նախքան 2020 թվականի պատերազմը: Հիմնադրամի «Կամուրջ» ծրագրով հատուցում են ստացել 1453 շահառուներ։
Սերժ Սարգսյանի գրասենյակի հրապարակած փաստաթղթի հետ կապված Factor.am-ը մեկնաբանություն խնդրեց նաև վարչապետ պաշտոնակատար Նիկոլ Փաշինյանի աշխատակազմից, որտեղից խոստացան արձագանքել՝ փաստաթղթին ծանոթանալուց հետո։ Սակայն դրանից տևական ժամանակ անց այդպես էլ որևէ պարզաբանում չստացանք, իսկ մեր զանգերը մնացին անպատասխան։
