19.12.2025 | 03:00
Կոնֆերենցիաների լիգա. «Նոայի» հավանական մրցակիցները փլեյ-օֆֆում
Քարոզարշավին մուրճի առկայությունը չի խոսում անհամաչափ ուժի մասին. Նազելի Բաղդասարյան. ՏԵՍԱՆՅՈՒԹ
Քաղաքականություն
15.06.2021 | 14:02
Քարոզարշավն ընթանում է, արդեն հաշված օրեր են մնացել մինչև համապետական ընտրությունների քվեարկության օրը: Տարբեր գործիչներ նշում են, որ կողմերը փորձում են հրահրել քաղաքացիական բախումներ: Ընդդիմադիր որոշ պատգամավորներ կարծիք են հայտնում, որ հենց Նիկոլ Փաշինյանն է շահագրգռված դրանում, քանի որ գիտակցում է, որ կորցնելու է իշխանությունը, այդ իսկ պատճառով արդեն մի քանի օրվա համար դիմել են քաղաքապետարան, որպեսզի Հանրապետության հրապարակում հանրահավաքներ անցկացնելու հնարավորություն ունենան:
Factor.am-ի հետ զրույցում անդրադառնալով այս դիտարկմանը՝ «Քաղաքացիական պայմանագիր» կուսակցության պատգամավորության թեկնածու Նազելի Բաղդասարյանը նշեց. «Թույլ տվեք իշխանությունը կորցնելու վերաբերյալ ոմանց այդ հոռետեսական կանխատեսումներին ժպիտով մոտենալ, որովհետև մեր հանդիպումները և քաղաքացիների հետ շփումները խոսում է ճիշտ հակառակի մասին: Ես որևէ կերպ չեմ կարող արդարացնել այն սին մեղադրանքները, որ հնչում է մեր հասցեին: Ինչ վերաբերում է Նիկոլ Փաշինյանի հռետորաբանությանը, ես կարծում եմ, որ երբեմն լինում են սուր արձագանքներ, բայց դա որևէ կերպ չի կարող հրահրել ինչ-որ գործընթացներ, որոնք հասարակական կարգը կխափանեն: Մենք բանավիճելու կողմնակից ենք, և կողմնակից ենք, որ բոլոր տեսակի խնդիրները լուծվեն հանդարտ հարթության վրա, այլ հարց է, որ որոշ քաղաքական ուժեր ունակ չեն բանավիճելու, և դեռ քարոզարշավի մեկնարկից սպառնում են, որ հաշվեհարդար է լինելու»:
Կա տեսակետ, որ Փաշինյանն ուզում է ատելության, թշնամանքի մթնոլորտ գեներացնել, և օրինակ են բերում այն, որ քարոզարշավներին մուրճով է գնում և ասում է՝ մեխելու ենք, անձամբ եմ պառկեցնելու ասֆալտին: Սա՞ ընդունելի լեքսիկոն է երկրի ղեկավարի կողմից: Անդրադառնալով այս հարցին՝ Բաղդասարյանը նկատեց, որ քարոզարշավի ընթացքում որոշակի այլաբանություններ օգտագործելը, պարզապես նշելը, որ այլևս թավշյա գործընթաց չի լինելու, և ժողովուրդը պետք է տա պողպատյա մանդատ, և մուրճի առկայությունը որևէ կերպ չի խոսում ուժի անհամաչափ կիրառման և այլ ագրեսիվ դրսևորումների մասին: Ցանկացած պարագայում պետք է նայել յուրաքանչյու քաղաքական գործիչի և ուժի անցած ճանապարհին. փառք Աստծո, մեր ձեռքերը մաքուր են, այրունոտ չեն՝ ի տարբերություն շատերի»:
Մանրամասները՝ տեսանյութում:
