«Կարիք կա՞, որ այստեղ դիվիդենտներ շահենք»․ Է․ Շարմազանովը՝ ընդդիմությանը

«Սա այն հարցն է, որտեղ չկա իշխանություն ու ընդդիմություն, այստեղ կա սրտացավ քաղաքացի, ովքեր ցանկանում են վերացնել այս խնդիրը: Մենք բոլորս պետք է ունենանք հստակ տեսլական ու գնանք: Կարիք կա՞, որ այստեղ դիվիդենտներ շահենք, կարծում եմ՝ չկա»։ Այս մասին ԱԺ կենտրոնական ամբիոնից հայտարարեց ԱԺ փոխնախագահ Էդուարդ Շարմազանովը՝ ելույթ ունենալով «Կոռուպցիայի կանխարգելման հանձնաժողովի» նախագծի շուրջ։

Ըստ իշխող ուժի խոսնակի՝ երկրի համար մեծագույն խնդրի՝ կոռուպցիայի դեմ պայքարում ընդդիմությունն ու իշխանությունը միասին պիտի պայքարեն: Շարմազանովի համոզմամբ՝ անշուշտ կգտնվեն քաղաքական ուժեր, որոնք կշահարկեն այս հարցը՝ քաղաքական դիվիդենտներ շահելու համար:

«Այս տարիների ընթացքում իշխանությունն ապացուցել է, որ ունի քաղաքական կամք՝ պայքարելու կոռուպցիայի դեմ: Դա դրսևորվել է ոչ միայն խոսքով, այլև գործով»,- ասաց նա:

Էդուարդ Շարմազանովի հավաստիացմամբ՝ պայքարի բաղադրիչներից մեկն էլ օրենսդրական նախաձեռնություններն են, իսկ իրենք պատրաստ են ընդդիմության առաջարկները լսել ու քննարկել:

Անդրադառնալով ընդդիմության դժգոհությանը, թե հանձնաժողովում ընդդիմադիրները ևս պետք է ներառված լինեն, Շարմազանովն ասաց, որ բոլորը պետք է մասնակցություն ունենան այս խորհրդի աշխատանքներին, բայց խորհրդում «իշխանականներ կամ ընդդիմադիրներ» չեն լինելու։

«Ես խնդրում եմ, որ այս հարցում չբաժանենք ընդդիմադիրի ու իշխանականի»,- շեշտեց նա:

Սեդա Ղուկասյան