Կոնստանտին Օրբելյանը նշանակվել է Նյու Յորքի քաղաքային օպերայի երաժշտական տնօրեն և դիրիժոր

Օպերայի և բալետի ազգային ակադեմիական թատրոնի տնօրեն և գեղարվեստական ղեկավար Կոնստանտին Օրբելյանը նշանակվել է Նյու Յորքի քաղաքային օպերայի երաժշտական տնօրեն և դիրիժոր. այս մասին հայտնում է operawire.com-ը:

Մաեստրո Օրբելյանի մասնակցությամբ առաջին օպերան՝ նոր շունչ ստացած «Ռիգոլետտո»-ն կցուցադրվի օգոստոսի 29-ին:

«Շատ ուրախ ենք՝ ողջունելու աշխարհահռչակ մաեստրո Կոնստանտին Օրբելյանին Նյու Յորքի քաղաքային օպերայի ընտանիք: Նա իր հետ բերում է դիրիժորության իր տասնամյակների փորձառությունը և ապագայում մեզ ու մեր հանդիսատեսին կառաջարկի շատ բարձր մակարդակի ներկայացումներ»,- նշել է օպերայի տնօրեն Մայքլ Կապասոն՝ համոզմունք հայտնելով, որ հայ մաեստրոն իր դերակատարումը կունենա Նյու Յորքի օպերան ամերիկյան ու միջազգային օպերային արվեստում նոր բարձունքների հասցնելու գործում:

Օրբելյանն ընդգծել է, որ սիրով է համաձայնել նշանակվել Նյու Յորքի օպերայի երաժշտական տնօրենի ու դիրիժորի պաշտոնում: «Սա լավ հնարավորություն է՝ օգնելու այս պատմական ու մշակութային տեսանկյունից կարևոր երաժշտական հաստատությունը վերադառնալ կյանք՝ կորոնավիրուսի մարտահրավերներով լի ժամանակներից հետո: Մենք հնարավորություն կընձեռենք օպերայի սիրահարներին լսել ԱՄՆ և ողջ աշխարհի ամենալավ երգիչներին: Հավատարիմ մնալով Նյու Յորքի քաղաքային օպերայի ավանդույթներին, մենք ժամանակակից կոմպոզիտորներին կտրամադրենք հարթակ, որտեղ նրանք կներկայացնեն իրենց աշխատանքները»,- ասել է Օրբելյանը:

Հիշեցնենք, որ Կոնստանտին Օրբելյանը 2016 թվականին նշանակվել էր Ալեքսանդր Սպենդիարյանի անվան օպերայի և բալետի ազգային ակադեմիական թատրոնի գեղարվեստական ղեկավար, իսկ 2017 թվականի հուլիսին այդ ժամանակ մշակույթի նախարարի պաշտոնը զբաղեցնող Արմեն Ամիրյանի հրամանով՝ թատրոնի տնօրեն։ 2019 թվականին մշակույթի նախարարի պաշտոնակատար Նազենի Ղարիբյանը որոշել էր  թատրոնի տնօրենի պաշտոնից ազատել նրան։ Այդ որոշումը չնայած դժգոհության ալիք բարձրացրեց աշխատակազմի մոտ, սակայն Օրբելյանը մարտի 29-ին ազատվեց տնօրենի պաշտոնից:

Թատրոնի մի խումբ աշխատակիցներ սկսեցին բողոքի ակցիաներ իրականացնել կառավարության շենքի դիմաց՝ պահանջելով Օրբելյանին վերականգնել տնօրենի պաշտոնին։ Աշխատակիցների հետ հանդիպման ընթացքում վարչապետ Նիկոլ Փաշինյանը նշել էր, որ տնօրենի պաշտոնում Օրբելյանի նշանակումն իրականացվել է օրենսդրության պահանջների խախտմամբ, ինչի կապակցությամբ քաղաքացիների կողմից դիմումներ են եղել։ 

«2017 թվականի ընթացքում Օրբելյանը 12 անգամ գործուղվել է տարբեր երկրներ՝ Կանադա, Լիտվա, Ավստրալիա, 7 անգամ՝ ՌԴ, հիմնականում Մոսկվա, 2 անգամ՝ ԱՄՆ և Արաբական Միացյալ Էմիրություններ: 2017 թվականի ընթացքում 135 օր է բացակայել աշխատանքից, 2018-ին՝ 174 օր, ևս 20 օր գտնվել է չվճարվող արձակուրդում: Ընդհանուր առմամբ, 194 օր բացակայել է աշխատանքից: Ֆինանսների նախարարության կողմից 2017 թվականի ընթացքում իրականացվել են ստուգումներ, որոնց արդյունքում արձանագրվել են 92 մլն դրամի խախտումներ: 2017-2018 թվականների ընթացքում վերականգնվել է ընդամենը 10 մլն 576 հազար 400 դրամը: Եթե վերականգնվել է, նշանակում է՝ այդ խախտումներն ընդունվել են որպես այդպիսին»,- Նիկոլ Փաշինյանը Օրբելյանի՝ տնօրենի պաշտոնից ազատման պատճառն այսպես էր ներկայացրել։ Նազենի Ղարիբյանն էլ բացատրում էր, որ Օրբելյանը զբաղեցնում էր միանգամից 3 պաշտոն՝ տնօրենի, գեղարվեստական ղեկավարի և դիրիժորի լիարժեք հաստիքներ: Օրբելյանը և թատրոնի աշխատակազմը ազատման հարցով դիմել էին դատարան,  արդյունքում 2020 թվականի փետրվարի 11-ին նա վերականգնվեց տնօրենի պաշտոնում։