Քաղաքականություն
03.06.2021 | 22:39
ԱՄՆ-ի Հետաքննությունների դաշնային բյուրոն (ՀԴԲ) եզրակացրել է, որ մսամթերք վերամշակող JBS USA ընկերության վրա կիբերհարձակման հետեւում կանգնած է Ռուսաստանի հետ կապեր ունեցող հաքերային մի խումբ, գրում է Ամերիկայի ձայնը։
«Մենք JBS- ի վրա հարձակումը կապում ենք REvil-ի և Sodinokibi- ի հետ և ձեռնարկում ենք բոլոր հնարավոր քայլերը մեղավորներին պատասխանատվության ենթարկելու համար»,- ասված է ՀԴԲ-ի կողմից հրապարակված հայտարարության մեջ:
«Մեր ջանքերը շարունակում են կենտրոնանալ ռիսկերի և հետևանքների ստեղծման, ինչպես նաև հանցագործներին պատասխանատվության ենթարկելու վրա: Մասնավոր հատվածում մեր համագործակցությունը կարևոր է կիբեր ներխուժումներին արագ արձագանքելու և մեր կիբեր հակառակորդների գործողություններից տուժած զոհերին աջակցություն ցուցաբերելու համար», – ասված է հայտարարության մեջ:
Մինչ ՀԴԲ-ն հրապարակում էր իր եզրակացությունները, ԱՄՆ-ի պետքարտուղար Էնթոնի Բլինքենը CNN en Español կայանին ասում էր, որ Ռուսաստանը պարտավոր է կասեցնել կիբերհարձակումները և պարտավոր է չթաքցնել հանցագործ կազմակերպություններին, որոնք ներգրավված են այդ հարձակումների մեջ»:
Բլինքենը կոչ է անում Ռուսաստանի ղեկավարներին վերահսկողություն հաստատել իրենց տարածքում գործող հանցավոր կազմակերպությունների վրա:
«Կարծում եմ, որ յուրաքանչյուր երկիր պարտավոր է անել հնարավորը ՝ այդ կազմակերպությունները հայտնաբերելու և նրանց արդարադատության ենթարկելու համար»,- ասել է Բլինքենը:
Փորձագետները պնդում են, որ REvil- ը և Sodinokibi- ն նույն խմբի տարբեր անուններն են: Ավելի վաղ հաղորդվել էր, որ այդ հաքերները կապված են Ռուսաստանի հետ:
Ըստ Forbes ամսագրի, REvil-ը կիբերհարձակումների համար տեղեկություններ է տրամադրում հանցավոր խմբավորումներին՝ շահույթի մասնաբաժնի դիմաց, սովորաբար մոտ 20-30 տոկոս:
IBM Security X-Force-ի գնահատմամբ, 2020 թվականին REvil- ի շորթման եկամուտը կազմել է առնվազն 81 միլիոն դոլար: Կիբերանվտանգության փորձագետները հայտարարել են, որ նման գործողությունների համար պահանջվող գումարը տատանվում է 1500-ից 42 միլիոն դոլարի միջեւ:
JBS USA- ը, երկրի ամենամեծ մսամթերք մատակարարողներից մեկը, կիրակի օրը ենթարկվել էր կիբերհարձակման, ինչը բացասաբար է անդրադարձել նրա գործունեության վրա: Ընկերությունը ստիպված էր փակել ԱՄՆ-ում տավարի մսի վերամշակման բոլոր գործարանները:
Հարձակումը տեղի ունեցավ մի քանի շաբաթ անց այն բանից հետո, երբ Colonial Pipeline խողովակաշարը ստիպված եղավ ժամանակավորապես դադարեցնել իր գործունեությունը կիբերհարձակման թիրախ դառնալու պատճառով:
Սպիտակ տան մամուլի քարտուղարի տեղակալ Քարին Ժան-Պիեռը ասել է, որ Սպիտակ տունը «այս հարցի շուրջ ուղղակիորեն աշխատում է Ռուսաստանի կառավարության հետ և հայտնում է նրան, որ բարձր պատասխանատվությամբ երկրները չեն թաքցնում հանցագործներին»:
