Երևանի Կենտրոնական կլինիկական զինվորական հոսպիտալում փետրվարի 12-ին մահացել է ՀՀ ԶՈւ զինծառայող Ստեփան Ստեփանյանը: Լուրը Factor.am-ի հետ զրույցում հաստատեց ՀՀ ՊՆ մամուլի խոսնակ Արծրուն Հովհաննիսյանը:
«Արձակուրդից վերադարձել է ֆիզիկապես բավական ծանր վիճակում, ունեցել է ուժեղ ցավեր, ապա արագ տեղափոխվել է հիվանդանոց, հետո՝ հոսպիտալ, որտեղ էլ մահացել է »,-ասաց Հովհաննիսյանը:
Հարցին՝ մինչ արձակուրդը գնալը բողոքներ ունեցե՞լ է, Արծրուն Հովհաննիսյանը պատասխանեց՝ ոչ, առողջ զինվոր է եղել: Իսկ թե ինչու զինծառայողի մահվան մասին պաշտոնական հաղորդագրություն չի եղել, Արծրուն Հովհաննիսյանն այսպես բացատրեց․ «Դեպքը զորամասից չի սկսվել, տնից է սկսվել, հետո հասել զորամաս»։
Զինծառայողի մահվան կապակցությամբ հարուցվել է քրեական գործ, հանգամանքները պարզվում են:
