25.11.2024 | 19:26
Պատժամիջոցների հետևանքով Թուրքիայի և ՌԴ-ի միջև առևտրաշրջանառության նվազում է կանխատեսվում․ Անկարայում ՌԴ դեսպան
«Բերում 90 րոպեում սղցնում եք»․ արտահերթ նիստը մեկնարկելուն պես ընդմիջվեց
Քաղաքականություն
07.06.2017 | 11:32
Խորհրդարանն արտահերթ նիստով քննարկում է Կառավարության կողմից ներկայացված նախագծեր, որոնց թվում է նաև «Պետական գույքի մասնավորեցման 2017-2020 թվականների ծրագիրը»։
«Ելք» խմբակցության ղեկավար Նիկոլ Փաշինյանը մտահոգություն հայտնեց հապճեպ քննարկվող նախագծերի վերաբերյալ՝ դժգոհելով, որ այդ նախագծի համար հատկացված է ընդամենը 90 րոպե քննարկում։
«Մի քանի տասնյակ պետական օբյեկտների մասնավորեցում է նախատեսված, քիչ չի հանրային քննարկում չի եղել, հանձնաժողովներում նորմալ քննարկում չի եղել, հիմա էլ 90 րոպե եք սահմանում քննարկման համար»,- ասաց նա։
Փաշինյանի հետ համակարծիք էր «Ծառուկյան» դաշինքի պատգամավոր Նաիրա Զոհրաբյանը․ «Բացարձակ անընդունելի է նման քննարկումը, առավել ևս, որ պոտենցիալ գնորդներ էլ դեռ չկան, բյուջեն լցնելու խնդիր է ընդամենը, բերում եք 90 րոպեում «սղցնում եք»»։
ԱԺ նախագահ Արա Բաբլոյանն արձագանքեց, որ հաննձաժողովի երեկվա քննարկումից հետո Փաշինյանի առաջարկությունը ներկայացրել են Կառավարությանը, ուստի հարցի քննարկումը կլինի երկու ժամ, սակայն սա էլ չմեղմեց ընդդիմադիրների վրդովմունքը։
Վարման կարգով խոսեց «Ելք» խմբակցության պատգամավոր Արտակ Զեյնալյանը՝ նկատելով, որ նման կարևոր նախագծի համար երկու ժամը շատ քիչ է։ Խոսեց նաև ԱԺ փոխնախագահ Միքայել Մելքումյանը, վերջինս էլ նկատեց, որ հարցը հանրային հնչեղություն է վայելում, ուստի քննարկումը մեկ ժամով ավելի երկարացնելը չի խանգարի։
ԱԺ փոխնախագահ Էդուարդ Շարմազանովն էլ շեշտեց՝ արդեն բովանդակային քննարկում է ընթանում՝ խուրհուրդ տալով ԱԺ նախագահին հարցը դնել քվեարկության։
Վարման կարգով ձայն խնդրեց ՀՀԿ խմբակցության ղեկավար Վահրամ Բաղդասարյանը՝ խնդրելով 20 րոպե ընդմիջում՝ «Կառավարության հետ ընդհանուր հայտարարի գալու համար»։
Խորհրդարանը 20 րոպեով ընդմիջեց աշխատանքը։
Սեդա Ղուկասյան
