Բուհերի կառավարման խորհուրդների կազմը հաստատելու է վարչապետը. ընդդիմադիրներն ու փորձագետները մտահոգված են

Ազգային ժողովում ընթանում են «Բարձրագույն կրթության ոլորտում օրենսդրական փոփոխություններ» թեմայով խորհրդարանական լսումներ: Հիմնական զեկուցող, կրթության և գիտության նախարար Լևոն Մկրտչյանին տրվող հիմնական հարցերից մեկը վերաբերում է բուհերի կառավարման խորհուրդների հաստատմանը:

«Բարձրագույն կրթության մասին» նոր օրենքի նախագծով՝ թեև բուհերի խորհուրդների կազմերում պաշտոնյաների ներգրավվածությունն արգելվելու է, սակայն խորհուրդների կազմերը  հաստատվելու են վարչապետի կողմից:

Այսօր լսումների ընթացքում Երևանի ավագանու «Ելք» խմբակցության անդամ, կրթության փորձագետ Անահիտ Բախշյանը  հայտարարեց՝ այդ կետի ավելացմամբ անհասկանալի են դառնում բուհերի ինքնավարության մասին նախարարի պնդումները:

«Հասկանալի է  քաղաքական  մեծամասնության նպատակը, բայց  սա ուղիղ հակասության մեջ է այն մարտահրավերին, որ դուք եկած օրվանից ասում եք՝ ապաքաղաքականացնել բուհերի կառավարումն ու ինքնավարությունը բարձրացնել: Չի կարող բարձրանալ, եթե վարչապետն է հաստատելու»,- դիմելով նախարարին՝ նշեց Անահիտ Բախշյանը:

Նախարարը փորձեց պարզաբանել՝  ցանկացած բուհի կառավարման խորհուրդ  հաստատման կարիք ունի:

«Օրինակ՝ մասնավոր բուհի խորհուրդը պետք է հաստատվի իր հիմնադրի կողմից, այսինքն՝ մասնավորի, պետության կողմից հիմնադրվող բուհի խորհուրդը ևս պետք է հիմնադրի կողմից հաստատվի, կարող ենք դնել, որ կառավարությունը հաստատի, որևէ սկզբունքային խնդիր չկա, կարող ենք գրել՝ նախարարն է հաստատում, բայց հիմնադիրը պարտավոր է  կազմը հաստատել, որպեսզի այն լեգիտիմ դառնա»,- շեշտեց նախարարը:

Երևանի ավագանու «Ելք» խմբակցության անդամ, կրթության, մշակույթի, սոցիալական հարցերի մշտական հանձնաժողովի նախագահ Արայիկ Հարությունյանը ևս անդրադարձավ նույն հարցին՝ կոչ անելով չառաջնորդվել անձնական շահերով:

«Չե՞ք կարծում եմ, որ այս տարբերակը կոնկրետ մեկ անձի շահով է պայմանավորված, որ վարչապետն է հաստատելու խորհուրդները: Բացի այդ, E-draft.am-ում քննարկման էր դրվել մի նախագիծ, որը , սակայն, կառավարություն է ներկայացվել կոնցեպտուալ փոփոխություններով: Վարչապետի կողմից հաստատումը լրջագույն խնդիր է առաջացնելու»,- հավելեց Հարությունյանը:

Լևոն Մկրտչյանը հակադարձեց՝ չի համարում  դա կոնցեպցիոն փոփոխություն, ասաց՝ ընդամենը իրավական բաց են լրացնել:

Կրթության և գիտության նախարարը նորից վստահեցրեց՝ պատրաստ են քննարկել բուհերի կառավարման խորհուրդների կազմերի հաստատման լիազորությունը ում տրամադրել՝ վարչապետի՞ն, թե՞ կառավարությանը:

 Հիշեցնենք, որ ավելի վաղ Factor.am-ը իր «Տարակարծիք» հաղորդաշարի շրջանակներում անդրադարձել էր թեմային՝ «Բուհական խորհուրդների ինքնավարության բարձրացո՞ւմ, թե՞ գերկենտրոնացում վարչապետի վերահսկողության տակ. ի՞նչ փոփոխություններ են սպասվում «Բարձրագույն կրթության մասին» նոր օրենքով» վերտառությամբ հրապարակման մեջ: 

Շողիկ Գալստյան