17.02.2026 | 23:22
ՀՀ ԱԳ նախարարի տեղակալը Հռոմում ներկայացրել է COP17-ի Հայաստանի նախագահության առաջնահերթությունները
Կորոնավիրուսի համաճարակի մեկնարկից առաջ Ուհանի վիրուսաբանության ինստիտուտի երեք գիտնականներ ծանր հիվանդությամբ հոսպիտալացվել են․ WSJ
Քաղաքականություն
24.05.2021 | 14:25
Չինաստանում Ուհանի վիրուսաբանության ինստիտուտի երեք գիտնականներ ծանր հիվանդությամբ հիվանդանոց են ընդունվել 2019-ի նոյեմբերին ՝ կորոնավիրուսի համաճարակի մեկնարկից մեկ ամիս առաջ: Այս մասին ասվում է The Wall Street Journal– ի ՝ մայիսի 23-ին լույս տեսած հոդվածում:
Հիմնվելով ամերիկյան հետախուզության զեկույցի վրա՝ հոդվածում ասվում է, որ կորոնավիրուսի և այլ հարուցիչների ուսումնասիրության լաբորատորիայում աշխատող վիրուսաբանների հիվանդությունը հիշեցնում էր և՛ COVID-19, և՛ սուր շնչառական վարակ:
Այսպիսով, ըստ թերթի, չինական լաբորատորիայից SARS-CoV-2-ի արտահոսքի վարկածը ստացել է լրացուցիչ ապացույցներ:
COVID-19- ի ծագման ուսումնասիրությամբ զբաղվող ԱՄՆ Պետդեպարտամենտի խմբի նախկին ղեկավար Դեյվիդ Աշերը համաձայնել է WSJ- ի սույն եզրակացության հետ:
«Խիստ կասկածում եմ, որ հատուկ պաշտպանված պայմաններով երրորդ մակարդակի լաբորատորիայում կորոնավիրուսի հետ աշխատող երեք հոգի մեկ շաբաթվա ընթացքում հիվանդանում են սուր շնչառական վարակով, ընկնում են հիվանդանոց, և դա կապ չունի կորոնավիրուսի հետ», – ասել է նա:
Հիշեցնենք, որ մարտի վերջին Առողջապահության համաշխարհային կազմակերպությունը Ուհան ուղարկված մասնագետների հետազոտությունների ադյունքների հիման վրա զեկույց էր հրապարակել ՝ COVID-19 կորոնավիրուսի ծագման վերաբերյալ:
Փաստաթղթում կորոնավիրուսի ծագման ամենահավանական վարկած է նշվում չղջիկներից մեկ այլ կենդանու միջոցով մարդուն փոխանցվելը։
Միևնույն ժամանակ, վարկածն այն մասին, որ համաճարակը սկսվել է Ուհանի վիրուսաբանության ինստիտուտի լաբորատորիայում COVID-19- ի արտահոսքից հետո, ԱՀԿ մասնագետները քիչ հավանական են համարում:
Մի շարք պետություններ, այդ թվում ՝ Միացյալ Նահանգները, իրենց մտահոգությունն են հայտնել ԱՀԿ փորձագետների՝ կորոնավիրուսի ծագման վերաբերյալ զեկույցի առնչությամբ:
Տաթև Ֆռանգյան
