27.11.2024 | 22:27
Հայաստանի մի շարք հասցեներում էլեկտրաէներգիայի անջատումներ կլինեն
Գազայի հատվածում Իսրայելի և Պաղեստինի միջև հրադադարը ուժի մեջ է մտել
Քաղաքականություն
21.05.2021 | 10:11
Գազայի հատվածում Իսրայելի և Պաղեստինի միջև հրադադարը ուժի մեջ է մտել ուրբաթ օրը, տեղի ժամանակով ժամը 02: 00-ին. հաղորդում է ՏԱՍՍ-ը:
Ինչպես հաղորդում է «Ալ-Աքսա» հեռուստաալիքը, Գազայի հատվածը նշում է «դիմադրության հաղթանակը» այն ճակատամարտում, որը պաղեստինյան խմբավորումներն անվանում էին «Սեյֆ ալ-Կուդս» («Երուսաղեմի թուր»): Հարյուրավոր մարդիկ Պաղեստինի դրոշներով դուրս են եկել Ռամալլայի փողոցներ՝ նշելու ռազմական գործողությունների ավարտը:
Հրադադարը ձեռք է բերվել Եգիպտոսի ակտիվ միջնորդությամբ ՝ 11-օրյա փոխհրթիռակոծումից հետո: Հինգշաբթի երեկոյան Իսրայելի ռազմաքաղաքական կաբինետը նեղ կազմով անցկացրած հատուկ նիստում հաստատել է միակողմանի հրադադարը: Համասի շարժումը Կահիրեի միջնորդությամբ համաձայնել է հրադադարի հաստատմանը:
Նշվում է, որ Եգիպտոսի նախագահ Աբդել Ֆաթթահ էլ-Սիսին հրամայել է երկու պատվիրակություն ուղարկել Պաղեստին և Իսրայել ՝ Գազայում հրադադարի ռեժիմի պահպանումը դիտարկելու համար:
Միևնույն ժամանակ նշվում է, որ հակամարտության կողմերի միջև փոխհրթիռակոծումը շարունակվել է մինչև վերջին պահը. հրադադարի ուժի մեջ մտնելուց 12 րոպե առաջ իսրայելական բանակը հաղորդել է հարավային շրջանների նոր գնդակոծությունների մասին:
Նշենք, որ Գազայում հակամարտության սկզբից պաղեստինցիների զոհերի թիվը հասել է 260 -ի, վիրավորվել է 1900 մարդ: Իսրայելական կողմից զոհվել է առնվազն 12 մարդ:
Այս ընթացքում ափամերձ անկլավում ամբողջությամբ ոչնչացվել է շուրջ 1800 բնակելի միավոր, մասամբ վնասվել է 16 800-ը: Գազայի կենտրոնում քանդվել է հինգ մեծ բնակելի բարձրահարկ շենք: Բնակարանային ֆոնդի և ենթակառուցվածքների վերականգնման համար անհրաժեշտ կլինի առնվազն $ 350 մլն դոլար:
