Ձեզ հայելիներ են պետք, որ հասկանաք՝ ինչքան կամազուրկ եք․ Բաբաջանյանը՝ իշխանություններին. ՏԵՍԱՆՅՈՒԹ

«ԱԺ աշխատակազմին պետք է խնդրել, որպեսզի իշխող խմբակցության պատգամավորների աշխատասենյակներում հայելիներ տեղադրեն։ Ձեզ հայելիներ են պետք, որպեսզի իրապես հասկանաք, թե ինչքան անբովանդակ են ձեր հայտարարությունները, հանձնառությունները և որքան կամազուրկ եք դուք, և թե ինչպես ենք մենք հայտնվել այս իրավիճակում՝ ձեր կամքի բացակայության պատճառով»,- ԱԺ նիստում, դիմելով իշխող խմբակցությանը, նշեց անկախ պատգամավոր Արման Բաբաջանյանը։

«ՍԴ-ի անունից հանդես եկող խմբակը, որի առնվազն երեք անդամներին ԱԺ-ն է ընտրել, մարտի մեկի գործով հանդես եկավ անհիմն որոշմամբ, որը չի դիմանում որևէ քննադատության։ Այդ խումբը կատարեց այն, ինչը ծրագրվել էր, և ինչի համար պայքարում էր նախորդ խումբը։ Այդ որոշումը կայացվել է՝ առաջնորդվելով բացառապես քաղաքական նկատառումներով»,- նշեց Բաբաջանյանը՝ անդրադառնալով  300․1 հոդվածը հակասահմանադրական ճանաչելու մասին ՍԴ-ի որոշումը։ Պատգամավորը կարծիք հայտնեց, որ այդ որոշումը կայացվել է բացառապես քաղաքական նպատակահարմարություններից ելնելով. «Ընդ որում դատավորներից յուրաքանչյուրն ունեցել է իր առանձին քաղաքական շահը»:

«Ապացույցները կան, բայց հոդվածը չկա, և այդ մարդը, որը ժողովրդի ջարդը սկսել էր Թատերական հրապարակում, մայիսի 9-ին որոշել է վերադառնալ այդ հրապարակ, ձեր թողտվությամբ և ձեր կամքի բացակայությամբ՝ մարդը քաղաքական հայտ է ներկայացնում»,-դիմելով իշխող խմբակցությանը՝ նշեց Բաբաջանյանը։

Նա դատախազությանը խնդրեց այս գործով որևէ նոր նախաձեռնությամբ հանդես չգալ. «Դուք տապալել եք այս գործը և ժողովրդի սպասումները խեղդվել եք ցեխում, մսխել եք հանրության վստահությունն ու ակնկալիքը»:

Մանրամասները՝ տեսանյութում: