Իմ գործընկերները վերադարձան հայամետ քաղաքականությանը․ իմքայլականները վրդովվեցին Սիմոնյանի խոսքից. ՏԵՍԱՆՅՈՒԹ

«Իմ գործընկերներն ի վերջո վերադարձան հայամետ քաղաքականության, և իմ գործընկեր պարոն Վարդանյանը վերադարձավ նաև իր հիմնական մասնագիտական առաքելություն՝ միջազգային մարդասիրական իրավունք և ընդգծեց, որ, այո, Շուշիում տեղի ունեցածը միջազգային մարդասիրական իրավունքի կոպիտ խախտում է»,- ԱԺ նիստում այս մասին նշեց «Լուսավոր Հայաստան» խմբակցության պատգամավոր Տարոն Սիմոնյանը։

ԱԺ նախագահ Արարատ Միրզոյանն արձագանքեց՝ նշելով, որ հնչեցված արտահայտությունը վիրավորական էր իրենց համար. «Հայամետ քաղաքականության թող վերադառնան նրանք, ովքեր հեռացել են այդ քաղաքականությունից»։

Տարոն Սիմոնյանը պատասխանեց. «Ես ամեն դեպքում զարմանալիորեն ուրախացա, որովհետև մեր գործընկերները ճիշտ բառապաշարով ընդգծեցին Ադրբեջանի հակահայկական քաղաքականությունը։ Իմ խնդրանքը և ամիսների հորդորը ի վերջո տեղ հասավ։ Եվ հուսով եմ, որ այս բառապաշարը մենք ճիշտ կօգտագործենք, որովհետև իրականում այն, ինչ տեղի է ունեցել Շուշիում և նաև Արցախի օկուպացված մյուս տարածքներում, դա ցեղասպան քաղաքականության շարունակությունն էր։ Եվ այդ ցեղասպանության շարունակությունն ըստ էության դրսևորվում է էթնիկ զտումներով, գերիների նկատմամբ նման վերաբերմունքով։ Եվ սա կրկին անգամ փաստում է, որ որևէ քաղաքական գործիչ ՀՀ-ում, ում խոսքը հանրային նշանակություն ունի, իրավունք չունի բարեկամական հարաբերությունների մասին խոսել Ադրբեջանի հետ, մի պետության հետ, որը նման ցեղասպան քաղաքականություն է վարում։

Մենք պետք է մեր դիրքորոշումները հստակեցնենք և պարզ լինենք միջազգային հանրության առաջ, որպեսզի նույն միջազգային հանրությունն արձագանքի Ադրբեջանի հակահայ քաղաքականությանը։ Այլապես, եթե մենք բարեկամությունից խոսենք, իսկ Ադրբեջանը շարունակի իր հակահայ քաղաքականությունը, միջազգային հանրությունը չի հասկանա մեզ»։

Մանրամասները՝ տեսանյութում: