08.11.2024 | 02:01
8-0. «Նոա»-ն չկարողացավ դիմակայել «Չելսի»-ին
Ալեքսեյ Նավալնիի տարածաշրջանային շտաբերը պաշտոնապես լուծարվել են
Քաղաքականություն
29.04.2021 | 15:48
Ռուս ընդդիմադիր առաջնորդ Ալեքսեյ Նավալնիի համախոհ Լեոնիդ Վոլկովը հայտարարել է Նավալնիի տարածաշրջանային շտաբերի ցանցի պաշտոնական լուծարման մասին, գրում է DW-ի ռուսական ծառայությունը:
«Նավալնիի շտաբերի ցանցի աշխատանքը ներկայիս տեսքով պահպանելն անհնար է. այն անմիջապես կներկայացվի ծայրահեղականության մասին հոդվածի ներքո և քրեական պատիժներ կսահմանվեն շտաբում աշխատողների, նրանց հետ համագործողների, նրանց օգնողների դեմ», – ապրիլի 29-ին իր Telegram- ալիքում պարզաբանել է Վոլկովը:
Միևնույն ժամանակ, Վոլկովը խոստացել է, որ ակտիվիստները կշարունակեն աշխատել այլ ձևաչափով:
«Այլևս Նավալնիի շտաբերի ցանց չկա, բայց կան տասնյակ հզոր տարածաշրջանային քաղաքական գործիչներ, կան նրանց հազարավոր աջակիցներ, կան ուժեղ և անկախ քաղաքական կազմակերպություններ, որոնք կզբաղվեն հետաքննություններով և ընտրություններով, հանրային արշավներով և հանրահավաքներով», – բացատրել է քաղաքական գործիչը:
Հիշեցնենք՝ ապրիլի կեսերին Մոսկվայի դատախազությունը դատական հայց էր ներկայացրել՝ պահանջելով Նավալնիի շտաբը և քաղաքական գործչի երկու հիմնադրամները՝ Հակակոռուպցիոն հիմնադրամը և Քաղաքացիների իրավունքների պաշտպանության հիմնադրամը, ճանաչել որպես ծայրահեղական կազմակերպություններ: Մոսկվայի քաղաքային դատարանը կասեցրել է այդ կազմակերպությունների գործունեությունը ՝ մինչ վերջնական որոշում կայացնելը:
