11.10.2026 | 23:33
Հակոբ Շարբաթյանը՝ բռնցքամարտի Եվրոպայի Մ-17 չեմպիոն. ՏԵՍԱՆՅՈՒԹ
Ադրբեջանցիները բողոքի ցույց են անցկացրել Բաքվում ՌԴ դեսպանատան դիմաց
Քաղաքականություն
28.04.2021 | 18:17
Բաքվում Ռուսաստանի դեսպանատան դիմաց այսօր «Ժողովրդական շարժում» հասարակական կազմակերպության անդամները բողոքի ակցիա են անցկացրել՝ նվիրված 1920 թվականին Ադրբեջանի խորհրդայնացմանը։
Մասնակիցները եղել են Ադրբեջանի և Թուրքիայի դրոշներով, ինչպես նաև «Պահանջում ենք ռուսական զորքերը դուրս հանել Ադրբեջանից» գրությամբ պաստառով։ Ոստիկանությունն այն վերցրել է մասնակիցների ձեռքից։ Ցուցարարները նաև հայտարարել են, որ ռուսներն ու հայերն իրենց թշնամիներն են։
«Մենք պահանջում ենք Ղարաբաղից ռուսական զորքերի դուրսբերում, նրանք խաղաղապահ չեն, թող նրանց տեղը թուրք զինվորականները զբաղեցնեն»,- ասել է ակցիայի մասնակիցներից մեկը։
«Եթե ռուս զինվորականները կրակում են «Իսկանդերով», ապա այդ զինվորականները չեն կարող խաղաղապահ համարվել։ Թող հեռանան»,- նշել է մեկ այլ մասնակից։
Ակցիայի կազմակերպիչները նաև լրատվամիջոցներում բանաձև են տարածել, որում նշվում է, որ «Ժողովրդական շարժումը» ռուս զինվորականների մուտքը Լեռնային Ղարաբաղ համարում է որպես ոտնձգություն Ադրբեջանի ինքնիշխանության դեմ։ Ըստ նրանց՝ ԼՂ-ում ռուս զինվորականները խաղաղապահ առաքելությամբ չեն զբաղվում, այլ անում են այն, ինչ ուզում են։
Ի դեպ, «Ժողովրդական շարժումը» ստեղծվել է 2019 թվականին, ներքին գործերի նախկին նախարար Իսկենդեր Համիդովի կողմից։
Նշենք, որ ավելի վաղ էլ «Մուսավաթ» կուսակցության անդամներն էին բողոքի ցույց կազմակերպել Ադրբեջանում ՌԴ դեսպանատան շենքի մոտ ու կրկին պահանջում էին ռուս խաղաղապահների հեռացում Արցախից։
Էմմա Չոբանյան
