27.11.2024 | 21:44
ՀՀ ԱԳՆ-ն՝ ԵՏՄ նիստը Սանկտ Պետերբուրգում անցկացնելու մասին
Բայդենի կողմից Հայոց ցեղասպանության ճանաչումից հետո Թուրքիան կարող է սառեցնել ԱՄՆ-ի հետ պաշտպանական ոլորտի համաձայնագիրը․ Bloomberg
Քաղաքականություն
27.04.2021 | 14:39
Թուրքիայի նախագահ Ռեջեփ Թայիփ Էրդողանը ձեռնպահ է մնում ՆԱՏՕ-ի իր դաշնակից ԱՄՆ-ի հետ հարաբերությունների սրումից, ինչը նշանակում է, որ թուրք ղեկավարը զգուշանում է իր երկրի ֆինանսների խափանումից։ Այս մասին գրում է Bloomberg պարբերականը։
Ջո Բայդենի կողմից Հայոց ցեղասպանության ճանաչումից հետո, երկուշաբթի Էրդողանն առաջին անգամ խոսել ու ԱՄՆ նախագահին մեղադրել է ՆԱՏՕ-ի երկու դաշնակիցների հարաբերությունները ներքաղաքական ճնշումերին զոհաբերելու համար։ Էրդողանը, ինչպես գրում է Bloomberg-ը՝ վկայակոչելով բարձրաստիճան թուրք պաշտոնյայի, կարող է սառեցնել ԱՄՆ-ի հետ պաշտպանական ոլորտում առանցքային համաձայնագիրը։
Ըստ լրատվամիջոցի՝ չնայած Բայդենի քայլը հիմնականում խորհրդանշական էր, այն ցույց է տալիս Էրդողանի նկատմամբ ամերիկյան նոր վարչակազմի վերաբերմունքը։
Հոդվածում ասվում է, որ խոսքը 1980 թվականի Պաշտպանական ու տնտեսական համագործակցության համաձայնագրի սառեցման մասին է, որը հնարավորություն է տվել համագործակցել ԱՄՆ-ի հետ տարածաշրջանային հակամարտություններում, ինչպիսիք են Սիրիան ու Իրաքը։ Պակտը, որը կարևոր ռազմական համագործակցության մաս է, ինչպես Թուրքիային, այնպես էլ ԱՄՆ-ին ապահովում է անվտանգային օժանդակությամբ, հնարավորություն է տալիս հետախուզական տվյալներ փոխանակել, համատեղ զորավարժություններ անցկացնել և ընդլայնել ամերիկյան ռազմական ներկայությունը թուրքական ավիաբազաներում։
Լրատվամիջոցը նաև հիշեցնում է, որ նախկինում Վաշինգտոնի հետ հարաբերությունների վատթարացման ժամանակ Էրդողանը սպառնում էր ԱՄՆ-ին չթողնել Քուրեչիկ, ինչպես նաև Ինջիրլիքի ավիաբազա, որը մոտ է Սիրիային և Պենտագոնի կողմից օգտագործվում է մարտավարական միջուկային զենք պահելու համար, սակայն նման բան հիմա տեղի չունեցավ։
Անդրադառնալով Հայաստանին՝ լրատվամիջոցը գրում է, որ 2020թ․ Թուրքիան ռազմական աջակցություն ցուցաբերեց Ադրբեջանին Հայաստանի դեմ Լեռնային Ղարաբաղի ռազմական կոնֆլիկտում։ Bloomberg-ը գրում է, որ Թուրքիայի կառավարությունը նաև քայլեր է ձեռնարկում շրջափակված Հայաստանի դեմ ու ավելացնում աջակցությունն Ադրբեջանին, ասել է լրատվամիջոցի աղբյուրը։
Էմմա Չոբանյան
