08.04.2026 | 01:11
Խարբերդի ամառանոցներից դեպի Նուբարաշեն ավտոճանապարհին 5 մեքենա է բախվել. 3 անձ հոսպիտալացվել է
Քաթարը մտադիր է դիվանագիտական տարաձայնությունները հարթել երկխոսության միջոցով
Քաղաքականություն
06.06.2017 | 10:14
Քաթարի ԱԳ նախարար շեյխ Մոհամեդ բեն Աբդ ալ Ռահման ալ Թանին հայտարարել է, որ երկրի իշխանությունները մտադիր չեն սրել հարաբերությունները Դոհայի հետ դիվանագիտական կապերը խզած Պարսից ծոցի համագործակցության խորհրդի անդամ երկրների հետ. հայտնում է Al Jazeera-ն:
«Մենք արտահայտել ենք մեր ափսոսանքն ու զարմանքը Քաթարի հետ դիվանագիտական կապերը խզելու առնչությամբ: Մենք չգիտենք,արդյոք կա՞ն իրական պատճառներ։ Քաթարն իր կողմից որևէ քայլ չի ձեռնարկի իրավիճակը սրելու համար, քանի որ գտնում է, որ եղբայրական պետությունների միջև նման խնդիրները պետք է լուծվեն բանակցային սեղանի շուրջ»,- նշել է նախարարը, ապա հավելել, որ եթե կային իրական պատճառներ, ապա դրանք կարող էին քննարկվել Ռիյադում կայացած գագաթաժողովի ժամանակ։
Ալ Թանիի խոսքով՝ Քաթարը մտադիր է առաջացած տարաձայնությունները հարթել երկխոսության միջոցով:
Ինչպես ավելի վաղ հայտնել էր Factor.am-ը, Սաուդյան Արաբիան, Եգիպտոսը, Արաբական Միացյալ Էմիրություններն ու Բահրեյնը խզել են դիվանագիտական կապերը Քաթարի հետ՝ նրան մեղադրելով ահաբեկչությանն աջակցելու մեջ։
«Քաթարն աջակցում է ահաբեկչական բազմաթիվ խմբավորումների՝ «Մուսուլման եղբայրներ», «Իսլամական պետություն», «Ալ Քաիդա», որոնց նպատակն է խախտել տարածաշրջանային կայունությունը»,- ասված է Սաուդյան Արաբայի պետական լրատվական գործակալության տարածած հայտարարությունում:
