19.02.2026 | 10:35
Մեկնարկում է Ժամանակակից երաժշտության փառատոնը
Արա Այվազյանն ու Ժերար Լարշեն անդրադարձել են թուրք-ադրբեջանական ագրեսիայի հետևանքով Արցախում ստեղծված հումանիտար իրավիճակին
Քաղաքականություն
24.04.2021 | 01:23
Ապրիլի 23-ին ՀՀ ԱԳ նախարար Արա Այվազյանը հանդիպել է Ֆրանսիայի Սենատի նախագահ Ժերար Լարշեի և նրա գլխավորած ներկայացուցչական պատվիրակությանը: Այս մասին տեղեկացնում է ՀՀ ԱԳՆ մամուլի ծառայությունը։
«Նախարար Այվազյանն իր խորին շնորհակալությունը հայտնեց Ֆրանսիայի Սենատի նախագահին՝ հայ ժողովրդի համար խորհրդանշական այս օրերին Հայաստան այցելելու և Հայոց ցեղասպանության 106-րդ տարելիցին նվիրված միջոցառումներին մասնակցելու համար: ՀՀ ԱԳ նախարարն ընդգծեց, որ այս օրերին նման բարձրաստիճան ներկայացվածությամբ այցը վերահաստատում է Հայաստանի և Ֆրանսիայի հանձնառությունը երկու ժողովուրդների դարավոր բարեկամությանը:
Կողմերը գոհունակություն հայտնեցին հայ-ֆրանսիական բազմաբովանդակ հարաբերությունների զարգացման դինամիկայի առնչությամբ՝ ընդգծելով բարձր մակարդակում փոխայցելությունների կարևորությունը և արդյունավետ երկխոսության շարունակականության կարևորությունը:
Անդրադառնալով միջխորհրդարանական մակարդակում երկու երկրների միջև ձևավորված սերտ համագործակցությանը՝ կողմերն առանձնահատուկ կարևորեցին Հայաստանի և Ֆրանսիայի խորհրդարաններում գործող բարեկամության խմբերի նշանակալի ավանդը: Այս համատեքստում նախարար Այվազյանը ողջունեց պատվիրակության կազմում գտնվող Սենատի Ֆրանսիա-Հայաստան բարեկամության խմբի նախագահ Ժիլբեր-Լյուկ Դըվինազին ու փոխնախագահ Էրվե Մարսելին:
Տարածաշրջանային անվտանգության ու կայունության հարցերի համատեքստում ՀՀ ԱԳ նախարար Արա Այվազյանը և Ֆրանսիայի Սենատի նախագահ Ժերար Լարշեն անդրադարձան թուրք-ադրբեջանական ագրեսիայի հետևանքով Արցախում ստեղծված հումանիտար իրավիճակին։ Այս առնչությամբ նախարար Այվազյանը կարևորեց Ֆրանսիայի Սենատի` Լեռնային Ղարաբաղի Հանրապետության ճանաչման անհրաժեշտության վերաբերյալ բանաձևի ընդունումը։
ՀՀ արտաքին քաղաքական գերատեսչության ղեկավարն իր զրուցակցի ուշադրությունը հրավիրեց նաև Արցախում պատմամշակութային և կրոնական ժառանգության պահպանման կարևորագույն խնդրին և այդ գործում միջազգային համապատասխան կառույցների ներգրավվածության կարևորությունը»,- ասվում է տարածված հաղորդագրությունում։
