27.04.2026 | 10:50
«Խարբերդի մասնագիտացված մանկատանը» պահպանվում են նախորդ այցերով արձանագրված խնդիրները․ ՄԻՊ
Սպիտակ տունը հաստատել է, որ Բայդենը Ցեղասպանության հիշատակի օրը հանդես կգա հայտարարությամբ
Քաղաքականություն
23.04.2021 | 22:18
Սպիտակ տան մամուլի քարտուղար Ջեն Պսակին հաստատել է, որ ԱՄՆ նախագահ Ջո Բայդենը հայտարարություն է անելու Օսմանյան կայսրությունում հայերի զանգվածային ջարդի կապակցությամբ, բայց չի ասել, թե կօգտագործի՞ «Ցեղասպանություն» եզրույթը, գրում է ՏԱՍՍ-ը:
«Ես չեմ կարող որևէ բան կանխատեսել: Ես ակնկալում եմ, որ նախագահը հայտարարություն կանի Զոհերի հիշատակի օրը, բայց ես չեմ կարող հաստատել ոչինչ հայտարարության բովանդակության վերաբերյալ ձեր ենթադրությունների մասին», – ասել է խոսնակը՝ ճեպազրույցի ժամանակ պատասխանելով լրագրողների հարցին։
Ավելի վաղ Wall Street Journal- ը հայտնել էր Բայդենի այս մտադրության մասին՝ հղում անելով ամերիկյան վարչակազմի աղբյուրներին:
Ըստ թերթի՝ Սպիտակ տան ղեկավարը ապրիլի 24-ին կարող է պաշտոնապես հայտարարել Ցեղասպանության ճանաչման վերաբերյալ իր որոշման մասին: Նշվում է նաև, որ վերջնական որոշում դեռ կայացված չէ, և Բայդենը կարող է սահմանափակվել պաշտոնական հայտարարությամբ, որում չի լինի ցեղասպանության փաստի պաշտոնական ճանաչում:
Բայդենի նախորդը՝ հանրապետական Դոնալդ Թրամփը, 1915 թվականի իրադարձությունների մասին իր հայտարարություններում խուսափեց նշել «ցեղասպանություն» բառը: Բարաք Օբաման (2009-2017), որի վարչակազմում Բայդենը ծառայում էր որպես փոխնախագահ, նույնպես խուսափեց այս սահմանումից: 2019 թվականին ԱՄՆ Կոնգրեսը և Ներկայացուցիչների պալատն առաջին անգամ ընդունեցին բանաձևեր, որոնցում Օսմանյան կայսրությունում 1915 թվականի ողբերգությունը որակվեց որպես Հայոց ցեղասպանություն:
