13.10.2026 | 17:45
Էդվարդ Կարապետյանը նշանակվել է ՀՀ քննչական կոմիտեի Երևան քաղաքի քննչական վարչության պետ
«Որոշել եմ, հեռանալով իմ երկրից, ժամանակս անցկացնել աղոթելով». Բեկչյանի հրաժեշտի նամակը ստամբուլահայերին. Tert.am
Քաղաքականություն
13.02.2018 | 13:13
Պոլսո Հայոց պատրիարքի պաշտոնաթող տեղապահ Գարեգին արքեպիսկոպոս Բեկչյանը Գերմանիա վերադառնալուց առաջ հրաժեշտի խոսք է ուղղել ստամբուլահայ համայնքին. փոխանցում է Tert.am-ը:
Ստամբուլի հայկական պարբերականներից «Ակօս»-ի էջերում հրապարակված հրաժեշտի նամակը ներկայացնում ենք ստորև՝ որոշակի կրճատումներով.
«Սիրելի՛ քույրեր և եղբայրներ:
Այն պահից սկսած, երբ ստանձնեցի Պոլսո Հայոց պատրիարքի տեղապահի պաշտոնը՝ դեմ առ դեմ հայտնվեցի որոշ զարմանալի փաստերի հետ. դրանցից ամենակարևորն այն էր, որ առաջին իսկ օրվանից չստեղծվեցին այն պայմանները, որոնք հարկավոր էին արդար, ճիշտ ու թափանցիկ ընտրության համար:
Կարիք չեմ զգում շարադրելու դրա բազմաթիվ դրսևորումներն ու օրինակներն այստեղ: Այդ տխրեցնող, վիրավորական օրինակները չեմ ցանկանում ո՛չ հիշել, ո՛չ հիշեցնել:
Սիրելի՛ քույրեր ու եղբայրներ, վերջին իրադարձությունները մեկ օրում մեջտեղ ելած բաներ չեն: Ցավոք, այն որոշումը, որը թվում է, թե ինձ է թիրախավորում, իրականում նպատակ ունի տապալելու Պոլսո Հայոց 85-րդ պատրիարքի ընտրություններն ու արդյունք է բավականին երկար ու լավ ծրագրված մի նախաձեռնության:
Որոշել եմ, հեռանալով իմ երկրից, ժամանակս անցկացնել աղոթելով երկար ժամանակ կոմայի մեջ գտնվող պատրիարք Մեսրոպ Մութաֆյանի և նրա դժբախտ մոր՝ Մարի Մութաֆյանի համար:
Իմ ներկայությունը չպետք է նոր տհաճությունների պատճառ դառնա առանց այդ էլ շատ տուժած հայ համայնքի համար:
Մենք դեռ մկրտության ժամանակ, մկրտությունից զատ, Աստծուց աղերսում ենք հավատք և հույս: Մեր հավատքն ու հույսը եկեք երբեք չկորցնենք: Աստված բոլորիս օգնական»:
Նշենք, որ Պոլսո Հայոց պատրիարքարանի հոգևոր խորհրդի որոշմամբ՝ Արամ աքեպիսկոպոս Աթեշյանը կշարունակի մնալ Պոլսո Հայոց պատրիարքի փոխանորդի պաշտոնում, քանի դեռ կոմայի մեջ գտնվող պատրիարք Մեսրոպ Մութաֆյանը կենդանի է և նոր ընտրություն չի թույլատրվի:
