31.10.2026 | 15:35
Առաջիկա օրերին հանրապետության առանձին շրջաններում անձրև կտեղա
Պատժի փոխարեն բարձր պաշտո՞ն. Արշակ Կարապետյանն ին՞չ դեր է ունեցել Մարտի 1֊ին եւ ինչ թերացում՝ քառօրյա պատերազմին. ՏԵՍԱՆՅՈՒԹ
Քաղաքականություն
13.04.2021 | 21:45
Ապրիլյան պատերազմից հետո Սերժ Սարգսյանի հրամանագրով 2016 թվականի ապրիլի 26-ին Զինված ուժերի Գլխավոր շտաբի հետախուզական վարչության պետի պաշտոնից թերացման պատճառով հեռացված Արշակ Կարապետյանը կրկին վերադառնում է Գլխավոր շտաբ:
Նիկոլ Փաշինյանն Արշակ Կարապետյանին նշանակել է Գլխավոր շտաբի պետի առաջին տեղակալի պաշտոնում՝ Տիրան Խաչատրյանի փոխարեն: Արշակ Կարապետյանի նշանակումը միանշանակ չի ընդունվել և սուր քննադատությունների է արժանացել:
Բանն այն է, որ Կարապետյանի գլխավորած հետախուզական վարչությունը թերացել էր իր պարտականություններում, և հայկական կողմը բավարար տեղեկություններ չի ունեցել, որ 2016 թվականին ադրբեջանական կողմը դիվերսիոն լայնամասշտաբ գործողությունների է նախապատրաստվում:
Եվ չնայած դրան՝ Սերժ Սարգսյանն Արշակ Կարապետյանին պաշտոնանկությունից հետո անգործ չէր թողել: Վերջինս, ամիսներ անց, նշանակվել էր Ռուսաստանում Հայաստանի դեսպանատանը կից ռազմական կցորդ:
2018 թվականի դեկտեմբերից արդեն Արշակ Կարապետյանը միացավ հեղափոխական թիմին և նշանակվեց վարչապետ Նիկոլ Փաշինյանի խորհրդական:
Թե Արշակ Կարապետյանը արցախյան վերջին պատերազմի ժամանակ Նիկոլ Փաշինյանին՝ Զինված ուժերի գերագույն գլխավոր հրամանատարի կարգավիճակում ինչ խորհուրդներ է տվել և որ արժանիքի համար է այժմ պաշտոնեական առաջխաղացման արժանանում՝ հայտնի չէ:
Նիկոլ Փաշինյանի թիմակից, ԱԺ պաշտպանության և անվտանգության հարցերի մշտական հանձնաժողովի նախագահ Անդրանիկ Քոչարյանը Արշակ Կարապետյանի՝ ապրիլյան պատերազմի հետ կապված թերացումների մասին պնդումներն արժանահավատ չի համարում։
Արշակ Կարապետյանն Ապրիլյան քննիչ հանձնաժողով հրավիրվել է երկու անգամ՝ Սերժ Սարգսյանի այցից առաջ և հետո, թե ինչո՞ւ, հիմնավորում չի ներկայացվել:
Քննիչ հանձնաժողովում ընդգրկված ընդդիմադիր պատգամավոր Գևորգ Գորգիսյանը, մինչդեռ, ուղիղ հայտարարում է՝ Ապրիլյան պատերազմի հանգամանքներն ուսումնասիրող հանձնաժողովի զեկույցում պատկառելի անդրադարձ կա Արշակ Կարապետյանի թերացումներին: Գորգիսյանը Փաշինյանի այս նշանակումն անհեթեթ է համարում: Նա փակագծեր չի բացում, բայց շեշտում է՝ Արշակ Կարապետյանի թերացումների հետ կապված քրեական գործեր հարուցելու անհրաժեշտություն կա: Հանձնաժողովում ընդգրկված ընդդիմադիր պատգամավորը վստահեցնում է՝ Արշակ Կարապետյանի թերացումների մասին քաջատեղյակ է նաև հանձնաժողովի նախագահ Անդրանիկ Քոչարյանը:
Անդրանիկ Քոչարյանը, սակայն, մեր հարցադրումներին ի պատասխան այդպես էլ չի բացահայտում, թե ընդդիմադիր գործընկերն ինչ թերացումների մասին է ակնարկում՝ հավելելով, որ դա ներառված է նաև իր գլխավորած հանձնաժողովի պատրաստած զեկույցում: ԱԺ պաշտպանության և անվտանգության հարցերի մշտական հանձնաժողովի նախագահ Անդրանիկ Քոչարյանից հետաքրքրվեցինք՝ արդյոք դժգոհություններ հայտնե՞լ է Արշակ Կարապետյանի մասին: Արշակ Կարապետյանը, որը Նիկոլ Փաշինյանի պաշտոնավարման ընթացքում պաշտոնական առաջխաղացումներ է ունենում, նախկինում քննադատվում էր Նիկոլ Փաշինյանի թիմակիցների կողմից:
«Քաղաքացիական պայմանագիր» կուսակցության ներկայացուցիչները Նիկոլ Փաշինյանի ներկայությամբ տարօրինակ էին համարում Կարապետյանին ռազմական կցորդ նշանակելը:
Ի դեպ, ուշագրավ է, որ Արշակ Կարապետյանի անունը կապվում է նաև 2008 թվականի Մարտի 1-ի արյունալի իրադարձությունների հետ: 2008-ի փետրվարի 23-ին պաշտպանության նախարարի հույժ գաղտնի 0038 հրամանով ստեղծված կայազորում Արշակ Կարապետյանը նշանակվել էր ՀՀ կայազորի պետի տեղակալ՝ հատուկ հանձնարարությունների գծով:
Քաղաքագետ Ստյոպա Սաֆարյանը խնդրահարույց է համարում Արշակ Կարապետյանի նշանակումն այն պարագայում, երբ նրա անվան հետ կապված տեղեկությունները վերջնականապես պարզաբանված չեն:
2018 դեկտեմբերին Նիկոլ Փաշինյանը, հակառակ Սերժ Սարգսյանի՝ հետախուզության թերացման մասին պնդումներին, հայտարարել էր, որ 2016-ի ապրիլին հետախուզական տվյալների պակաս չի եղել։ Քաղաքագետն ասում է, որ այս իրարամերժ հայտարարությունները խորացնում են ճգնաժամը: Ստեղծված իրավիճակում մնում է հուսալ, որ, ի վերջո, կհրապարակվի Ապրիլյան պատերազմի հանգամանքներն ուսումնասիրող քննիչ հանձնաժողովի զեկույցը և բացահայտումներ խոստացած իշխանությունները կտան բոլոր հարցերի պատասխանները:
Մինչ այդ նշենք, որ Արշակ Կարապետյանի՝ ԳՇ պետի առաջին տեղակալի պաշտոնում նշանակելը հարթ չի անցել: Նախագահ Արմեն Սարգսյանը հրաժարվել է ստորագրել Փաշինյանի որոշման նախագիծը, և վերջինս նշանակվել է իրավունքի ուժով:
Նարեկ Կիրակոսյան
