Կենտրոն վարչական շրջանի բնակվարձերը բարձրացել են. ինչո՞վ է պայմանավորված թանկացումը

Կենտրոն վարչական շրջանի բնակիչների համար թանկացել են ոչ միայն պարենային մթերքներն ու դիզելային վառելիքը, այլև բնակվարձերը: Եթե նախկինում, օրինակ 5 հարկանի, առանց վերելակի շենքերի բնակիչները, մեկ քառակուսի մետրի համար վճարում էին 15 դրամ, ապա այժմ նրանք կվճարեն հինգ դրամով ավելի՝ մեկ քառ. մետրի համար 20 դրամ:

Կենտրոնի համայնքապետարանի իրավաբան Սոֆյա Տոնոյանը Factor.am-ի հետ զրույցում ներկայացրեց, թե ինչով է պատճառաբանվել այս թանկացումը. «Հինգ դրամների ավելացմանը զուգահեռ, մենք պետք է ավելացնենք մեր աշխատանքների ծավալը: Նախկինում հավաքագրված գումարները չէին բավարարում, որպեսզի մեզ վրա դրված լիազորությունները պատշաճ իրականացվեին»:

Ինչպես տեղեկացանք Երևանի քաղաքապետարանի համատիրությունների հետ աշխատանքների բաժնի պետ Հարություն Խաչատրյանից, ներկայումս Երևանում գործում է191 համատիրություն և գանձվող գումարի ավելացումը բոլորի վրա չի ազդել: Խաչատրյանը տեղեկացրեց, որ համատիրությունների կողմից հավաքագրվող գումարները տարբեր վայրերում տարբեր են: Սկսած 10 դրամից մինչև 80-100 դրամ. «Համատիրությունն ինքը հավաքագրում է գումարները և օրենքի համաձայն որոշում կայացնում գումարի չափի վերաբերյալ: Նայած, թե ինչպիսի շենքեր են, ինչպիսի աշխատանքներ պետք է կատարվեն, բարձրահարկների, վերելակներով շենքերի համար ավելի շատ են հավաքագրում և այլն»:

Համատիրությունների կողմից հավաքագրվող գումարների չափը որոշում են սեփականատերերը, Հարություն Խաչատրյանը նշեց, որ դա նրանց իրավունքների մեջ է մտնում. «Կարող է ցանկացած համատիրություն նորից օրենքով սահմանված ժողով անել և ելնելով շենքի վրա տարվող աշխատանքների ծավալից՝ ավելացնել կամ պակասեցնել հավաքագրվող գումարը»:

Պաշտոնյան հավելեց՝ տարվող աշխատանքներն օրենքով սահմանված պարտադիր նորմերի աշխատանքներ են, որոնց վերաբերյալ տեղեկությունները փակցվում են շենքերին և բնակիչները կարող են ծանոթանալ, թե իրենց վճարած գումարներն ինչի վրա են ծախսվել: Իսկ քաղաքացիների դժգոհությունների հետ կապված էլ համատիրությունների աշխատանքը համակարգող պաշտոնյան, նշեց, որ բնակիչները կարող են ծանոթանալ տարեկան հաշվետվություններին, եթե նկատեն խախտումներ՝ կարող են բողոքարկել իրենց համատիրություններին:

Լիլիթ Շաբոյան