Վարչապետին է տրվում մի ամբողջ անվտանգային ոլորտ, որը դուրս է խորհրդարանի և կառավարության վերահսկողությունից. Էդմոն Մարուքյան

«Մենք անցնում ենք վարչապետական համակարգի և այդ համակարգի ներսում ամեն ինչ փակելու տրամադրվածություն կա: Դրանից ելնելով՝ նաև կառավարության նիստերն են փակ լինելու»,- Factor.am-ի հետ զրույցում կարծիք հայտնեց ԱԺ «Ելք» խմբակցության պատգամավոր Էդմոն Մարուքյանը՝ անդրադառնալով ապրիլից հետո գործադիրի նիստերը փակ անցկացնելու կառավարության նախաձեռնությանը:

Հիշեցնենք՝ երեկ արդարադատության նախարար Դավիթ Հարությունյանը ներկայացրեց կառավարության նիստերի անցկացման կարգի փոփոխություն նախատեսող «Կառավարության կառուցվածքի և գործունեության մասին» օրենքի նախագիծը՝ նշելով, որ այդ փոփոխությունը կնպաստի կառավարության նիստերի անցկացման արդյունավետությանը: Էդմոն Մարուքյանը, սակայն, նկատում է՝ ամեն բան արվում է, որ ժողովրդավարության եղած նշույլներն էլ վերացվեն:

«Վարչապետին է տրվում մի ամբողջ անվտանգային ոլորտ, որը դուրս է խորհրդարանի և կառավարության վերահսկողությունից: Այդ մարմինների ղեկավարները պետք է հաշվետու լինեին խորհրդարանի առաջ և ժամանակ առ ժամանակ ներկայացնեին իրենց գործողության մասին հաշվետվություն: Խորհրդարանի անդամները պետք է հնարավորություն ստանային նրանց հարցեր ուղղելու, հակակշռելու, այսինքն՝ այն, ինչը չկար նախագահական համակարգում, բայց պարզվում է՝ չկա նաև խորհրդարանական համակարգում»,- շեշտեց ընդդիմադիր պատգամավորը:

Մարուքյանը համոզված է՝ իշխաննությունների մոտ ի սկզբանե չի եղել խորհրդարանական պետություն ունենալու տեսլական, այլ ընդամենը նպատական են ունեցել վերացնել նախագահի ընտրությունները:

Հարցազրույցն ամբողջությամբ՝ տեսանյութում:

Շողիկ Գալստյան