Միրգն ու բանջարեղենը կոյուղաջրերով են ջրել․ գարշահոտության առեղծվածը՝ ըստ տեսչական մարմնի

Նորագավիթի բնակիչներն արդեն մի քանի ամիս է պայքարում են անտեսանելի թշնամու դեմ, որին ճանաչում են հոտով։ Նա գալիս է աննկատ և առավոտյան անհետանում է։ Դուռ-պատուհան բացելը չի օգնում։ Գարշահոտությունը և տանն է, և դրսում։ Բնակիչների հիմնական զենքն այս պատերազմում խոնավ լաթի կտորն է, որով փակում են լողարանների հոսակները։ Բայց վերջերս դա չի օգնում։ Բնակիչների վարկածը՝ «արտադրականն» է։ Ըստ նրանց, ինչ- որ ստվերային արտադրամաս է աշխատում, որը թունավոր թափոններ է լցնում կոյուղի։

Անցյալ շաբաթ գարշահոտությունը սաստկացել էր, բնակիչները զանգեցին 911։ Եկան փրկարարները, ռետինե հագուստ հագած, դիտահորերը բացեցին, նմուշներ վերցրեցին և մի քանի օրից զեկուցեցին։ «Կատարվել են տեղանքում օդի և դիտահորերի ջրի նմուշառումներ, որոնք ենթակա են հետագա լաբորատոր հետազոտության: Ստացված տվյալներով՝ նշված տարածքում օդի բաղադրության մեջ և դիտահորերում վտանգավոր կամ թունավոր նյութեր չեն հայտնաբերվել, իսկ գարշահոտությունը տարածվում է դիտահորերում առկա կոյուղաջրերից: Մարդկանց առողջությանը վտանգ չի սպառնում»:

Բնապահպանական տեսչությունը ևս ուսումնասիրություններ է կատարել։ Եկել է եզրակացության․ գարշահոտության համար պատասխանատու են դաշտերը կոյուղաջրով ոռոգող գյուղացիները։ Բնապահպանական տեսչական մարմնում այս համոզման են եկել սեպտեմբերի վերջին, երբ նույն ահազանգը ստացան Մասիսից։ Ստուգայցերի ժամանակ տեսուչները արձանագրեցին, որ որոշ հատվածներում գյուղացիները կոտրել են կոյուղու խողովակները և արտանետումներով հարուստ ջուրն ուղղում են իրենց դաշտերը։ Բնակիչները, սակայն, ասում են, որ չեն հավատում այս վարկածին։

Գյուղացիները նկատել են․ ԱԻՆ աշխատողների հեռանալուց երկու օր անց գարշահոտությունն անցել է, հետո կրկին վերադարձել։ Բնապահպանության տեսչության աշխատակիցները ստուգումներ են իրականացրել նաև տնտեսվարողների մոտ։ Մոտ 26 արտադրություն է գործում Նորագավիթում։ Բոլորին ստուգել են, խախտումներ չեն հայտնաբերել։ 5 պետական մարմիններից կազմված հանձնաժողովը դեռ շարունակում է ուսումնասիրությունները։ Իսկ Նորագավիթում, Մասիսում, Նոր Արեշում գարշահոտությունից հոգնած մարդիկ անհամբեր են։ «Մենք էս երկրի քաղաքացի ենք, մենք էլ ապրելու իրավունք ունենք», – ասում է առաջին փողոցի բնակիչ Սուսաննա Մանուկյանը։

Սյուզան Սիմոնյան