Իրանը կեղծ է անվանել այն ձայնագրությունը, որում Զարիֆը խոսում է ուկրաինական բոինգի կործանման մասին

Իրանական կողմը կասկածի տակ է դրել այն ձայնագրության իսկությունը, որում Իրանի ԱԳՆ ղեկավար Մոհամմադ Ջավադ Զարիֆը,  իբրև թե, խոսում է Թեհրանի մոտակայքում ուկրաինական ինքնաթիռի կործանման մասին։ Այս մասին հայտարարել է Իրանի ԱԳՆ պաշտոնական ներկայացուցիչ Սաիդ Խաթիբզադեն, գրում է ՏԱՍՍ-ը։

«Համապատասխան հոդվածում արված պնդումները սխալ են և այն արտահայտությունները, որոնք վերագրվում են Զարիֆին, հակասում են նրա խոսքի մշակույթին։ Նման ձայնագրության առկայության մասին հայտարարությունները չեն համապատասխանում իրականությանը»,- ասել է նա։

Դիվանագետը նաև կոչ է արել Կանադային «չխորացնել զոհվածների ընտանիքի անդամների սուգը նմանատիպ գործողություններով ու բամբասանքներով»։

Նրա խոսքով՝ «Իրանի կառավարությունը նվիրված է լինելու իր միջազգային պարտականություններին ու իրենց մտերիմներին կորցրած ընտանիքների իրավունքների  իրացմանը, որոնց ճնշող մեծամասնությունը հանդիսանում են Իրանի քաղաքացիներ։

«Թեհրանը քայլ առ քայլ կիրականացնի իր միջազգային պարտականությունները՝ համաձայն ներքին ու համաշխարհային նորմերի»,- հավելել է Խաթիբզադեն։

Փետրվարի 9-ին CBC-ը հայտնել է, որ Կանադայի անվտանգության գործակալությունները ուսումնասիրում են մի ձայնագրություն, որտեղ, ենթադրաբար, Իրանի արտաքին գործերի նախարարը ինչ-որ մեկի հետ քննարկում է հավանականությունը, որ Թեհրանի մերձակայքում 2020-ի հունվարին ուկրաինական ինքնաթիռի ոչնչացումը դիտավորյալ է եղել: Ըստ լրատվականի աղբյուրի՝ Զարիֆը, իբրև թե, ձայնագրությունում ասում է, որ Իսլամական Հանրապետության բարձրագույն ղեկավարությունը և գեներալները, մի շարք պատճառներով, երբեք չեն բացահայտի այս ողբերգության իսկությունը, քանի որ դա կարող է սպառնալ երկրի անվտանգությանը:

2020 թվականի հունվարի 8-ին Թեհրանի օդանավակայանից թռիչքից անմիջապես հետո վթարի է ենթարկվել «Ուկրաինա» միջազգային ավիաուղիների «Թեհրան – Կիև» («Բոինգ 737-800») չվերթը: Զոհվել էր 176 մարդ. Իրանի, Ուկրաինայի, Կանադայի, Մեծ Բրիտանիայի, Գերմանիայի, Շվեդիայի և Աֆղանստանի քաղաքացիներ։

Տաթև Ֆռանգյան