21.12.2025 | 22:02
Ֆուտզալի Հայաստանի հավաքականը հաղթեց Մոլդովային
Եթե փոփոխություն առաջարկող ուժերը փողոցային պայքար սկսեն, իշխանության համար ավելի ծանր կլինի․Սաքունց. ՏԵՍԱՆՅՈՒԹ
Քաղաքականություն
10.02.2021 | 13:05
Բացի հանրային պահանջ չլինելու մասին թեզից՝ «Իմ քայլը» չի ներկայացրել ողջամիտ հիմնավորում, թե ինչու չպետք է լինեն արտահերթ ընտրություններ: Արտահերթ ընտրությունների անհրաժեշտության հիմնական պատասխանատուն իշխանությունն է: Եթե իշխանությունը չի կատարում իր ստանձնած պարտավորությունները, առաջ են գալիս հանրային դժգոհություններ, և օրակարգում արտահերթ ընտրությունների հարց է առաջանում: «Արտահերթ չընտրություններ. քաղաքական պայքարը տեղափոխվում է փողո՞ց» քննարկման ժամանակ այս մասին ասաց ՀՔԱ Վանաձորի գրասենյակի ղեկավար, իրավապաշտպան Արթուր Սաքունցը:
Նրա դիտարկմամբ՝ այն, որ իշխանությունը հեղափոխությունից հետո համակարգային արմատական փոփոխություններ չկատարեց, դա է առաջին հերթին արտահերթ ընտրությունների պահանջի հիմքում: Իրավապաշտպանի խոսքով՝ մինչպատերազմական շրջանի խնդիրներին ավելացել են պատերազմի և համավարակի հետևանքով առաջացած խնդիրները, իսկ իշխանությունը ցնցող կոնցեպցիա չի առաջարկում, և լուծումների մասին առաջարկի բացակայությունն արտահերթ ընտրությունների հիմնավորումն է:
«Ընդդիմություն կարող է լինել միայն փոփոխությունների առաջարկ ներկայացնողը։ Արմատական փոփոխություններ կատարելու հարցը Հայաստանում օրակարգում է: Արմատական փոփոխություններ չկատարելու հետևանքով մենք ունեցանք սարսափելի կորուստներ: Հիմա իշխանությունն ի վիճակի՞ է Հայաստանի և ՀՀ քաղաքացիների անվտանգությունը երաշխավորել․ չենք տեսնում գործողություններ, և չկա հանրային վստահություն։ Եթե փոփոխություններ առաջարկող ուժերը փողոցային պայքար սկսեն, իշխանության համար ավելի ծանր է լինելու, և դա կլինի»,- ընդգծեց Սաքունցը՝ հավելելով, որ իշխանությունը լուծումներ չի առաջարկում, հետևաբար՝ պետք է հեռանա:
Մանրամասները՝ տեսանյութում:
