Ուշագրավ փաստեր՝ նոր նախագահի նստավայրի մասին

Հայաստանի խորհրդարանական հանրապետության առանցքային 4 պաշտոնյաներից երեքի անունը, կարելի է ասել, արդեն հայտնի է: Մամուլում այժմ քննարկումներ են ծավալվում այն մասին, թե նրանցից ով որտեղ է պաշտոնավարելու: Արդեն հայտնի է, որ վարչապետի նստավայրը կլինի Բաղրամյան 26-ը՝ նախագահի նստավայրը, առաջին փոխվարչապետի նստավայրը՝ կառավարության շենքը: Իսկ ահա ՀՀ նախագահի նստավայրի համար քննարկվում է երկու տարբերակ. ԱԱԽ շենք կամ կառավարության ընդունելությունների տուն:

Այդ երկու կառույցների կարգավիճակն էլ ուշագրավ է: Այսպես. Կառավարության ընդունելությունների տունը հանվել է աճուրդի՝ ներկայացվելով 2017-20 թվականներին մասնավորեցման ենթակա 47 միավոր պետական գույքի մեջ: Մաշտոցի 47 հասցեում գտնվող այս շենքում կառավարության և այլ բարձրաստիճան հյուրերի բարձր մակարդակով հյուրանոցային սպասարկում, ընդունելություն ու լայնամասշտաբ միջոցառումներ պետք է կազմակերպվեին: Բայց քանի որ քաղաքական էլիտայի ներկայացուցիչների մի մասը շքեղ հյուրանոցատերեր են, ուստի այդ ընդունելությունները կազմակերպվում են ոչ պետական հաստատություններում, և պետական միլիոնները գնում են մեզ հայտնի գործարար պատգամավորների գրպանները:

Արդյունքում ընդունելությունների տունը ծանր բեռ է դարձել բյուջեի վրա: Այս կառույցի պարտքը կազմում է կես միլիարդ դրամ: Շենք-շինությունների պահպանման համար անհրաժեշտ կոմունալ ծախսերը միայն մեկ տարվա համար գերազանցում են 70 մլն դրամը: Շենքի սպասարկող անձնակազմը՝ 33 աշխատող, նամակներ էին հասցեագրում նախագահին, վարչապետին՝ պահանջելով աշխատավարձը և սպառնալով դատի տալ: Արդյունքում 2017թ. հունիսին նրանք բոլորը՝ մեկ մարդու պես, ազատվեցին աշխատանքից:

Ու թեև կառավարությունը ֆինանսական խնդիրները փոքր-ինչ բարելավելու համար առաջակել էր 2017թ. միջոցառումների անցկացման համար որպես նախընտրելի տարբերակ «Ընդունելությունների տուն» ՓԲԸ-ն դիտարկել, բայց ամբողջ տարվա ընթացքում այստեղ կայացավ ընդամենը երկու միջոցառում:

Նշենք, որ ընդունելությունների տան նորոգման համար կառավարությունը 2015թ-ին 1.5 մլրդ դրամ է հատկացրել՝ Որոտանի կասկադի վաճառքից ստացված գումարներից: Ու այժմ վերանորոգված պետգույքը վաճառվում է:

Ինչ վերաբերում է ԱԱԽ շենքին, ապա թանկարժեք այս կառույցը հիմնման օրվանից դարձավ ավելորդ: ԱԱԽ-ն ստեղծվել էր Արթուր Բաղդասարյանին բարձր պաշտոնով ապահովելու համար՝ 2008թ. ընտրություններից անմիջապես հետո: Շենքի կառուցման համար պետբյուջեից ծախսվեց 600 միլիոն դրամ, անցած ամռանն էլ ընթացիկ վերանորոգումների համար հատկացվել է շուրջ 47 միլիոն դրամ: Ամեն դեպքում, այս պահին ուշագրավ է այն հանգամանքը, որ նոր նախագահը պաշտոնավարելու է կամ աճուրդի հանված շենքում, որը միայն պարտքեր է ավելացրել բյուջեին, կամ հարկատուների վրա բեռ դարձած նախկին ԱԱԽ շենքում:

Սևակ Հակոբյան