Նկուղում ապրող բազմազավակ ընտանիքի համար խոստացել են բնակարան գնել. «բարեգործական» իրարանցում մեր հերոսի շուրջ

Դեկտեմբերի 26-ին Factor.am-ը այցելել էր նախկին ազատամարտիկ, բազմազավակ Վիրաբ Շաբոյանին, որը չկարողանալով վճարել տան վարձը, Ամանորից առաջ կնոջ և 12 երեխաների հետ ճարահատյալ զավթել էր Մոլդովական փողոցում գտնվող Նոր Նորքի հանրակացարանի նկուղը:

Պետգույքի կառավարման վարչությանը պատկանող այս տարածքում ընտանիքն ապրում է առանց լույսի, ջրի, առանց ջերմության: Վիրաբ Շաբոյանը տաքսի է քշում, բայց իր ստացած եկամուտով չի կարողանում ընտանիքի համար գոնե տանելի պայմաններ ապահովել: Շաբոյանները չունեն տարրական կենցաղային իրեր, երեխաները ոտաբոբիկ են, չունեն հագուստ, կոշիկ:

Ռեպորտաժը, որը պատրաստել էինք, հուզել էր շատերին: Այն դիտելով, Վիրաբ Շաբոյանին օգնելու ցանկությամբ մարդիկ՝ Հայաստանից և սփյուռքից, կապվում էին մեզ հետ, խնդրում էին Շաբոյանների հեռախոսահամարները: Ֆեյսբուքում անգամ հատուկ խումբ ստեղծվեց՝ «Պահաջում ենք բնակարան ազատամարտիկին» անվամբ:

«Երկիր Ծիրանի» խմբակցության ղեկավար Զարուհի Փոստանջյանը ևս, տեսնելով ռեպորտաժը, այցելել էր ընտանիքին, ապա ֆենսբուքյան իր էջում գրել էր այս ընտանիքի մասին:

Անցել է մոտ մեկ ամիս: Վիրաբ Շաբոյանից հետաքրքրվեցինք, թե ինչ է փոխվել այս ընթացքում: Նա հայտնեց, որ երեխաների հետ ապրում է նույն նկուղում, բայց երեկ հույս է առաջացել, որ շուտով Շաբոյանների կյանքը կփոխվի: Նախկին ազատամարտիկին իր մոտ է կանչել Երևանի քաղաքապետարանի աշխատակազմի անշարժ գույքի կառավարման վարչության պետ Արսեն Ամյանը և հայտնել, որ որոշվել է Նոր Նորքի հանրակացարանային շենքում բնակարան գնել Շաբոյանների համար:

«Հիմա մեր մասիվի թաղապետն ու քաղաքապետը որոշել են մեր շենքից տարածք առնեն, որ ապրենք, բայց սա հաստատ չի, պետգույքի վարչությունից է նաև կախված», – հայտնեց մեզ Վիրաբ Շաբոյանը:

Նա պատմեց, որ այս ամսվա ընթացքում իրեն եկել գտել են բարեսիրտ մարդիկ Հայաստանից և սփյուռքից. «Երեկ երկու աղջիկներ էին եկել, ոնց որ ԱՄՆ-ում են ապրում, ասեցին, ձեզ համար ով ինչ կանի, կապ չունի, մենք ուզում ենք ընկերուհիներով ձեզ համար առնել, ինչի կարիք որ ունեք՝ կահույք, իրեր»:

Մի տղամարդ Բելգիայից սկայպով, հարևանների միջոցով կապվել է ընտանիքի հետ, առաջարկել է Վիրաբին բնակարան վարձել, խոստանալով, որ ինքը կփոխհատուցի վարձի գումարը: Վիրաբ Շաբոյանը հրաժարվել է օգնությունից: Բացատրում է. «Ասեցի՝ լավ, մի քանի ամիս ասենք թե՝ օգնեք, բա հետ՞ո, ես էլի կմնամ փողոցում»:

Ամենաանսպասելին եղել է Նոր Նորքի թաղապետ Արմեն Ուլիխանյանի այցը: «Առաջ մենք իրեն դիմել էինք, չէր էլ ընդունել: Հիմա փոխվել է: Գիշերը ժամը մեկին եկավ մեր տուն, տեսավ, տպավորությունը փոխվեց: Մեզ հիմա ամեն անգամ զանգում են թաղապետարանից, հետաքրքրվում են, մեզ օգնություն տվեցին ու մտցրել են օգնությունների ծրագրում, որ մշտական օգնեն», – նշեց Վիրաբ Շաբոյանը:

Սյուզան Սիմոնյան