ԱՄՆ-ում վախենում են զինված բողոքի ցույցերից․ Վաշինգտոնում արտակարգ իրավիճակ է հայտարարվել

ԱՄՆ Դաշնային անվտանգության ծառայությունը զգուշացնում է երկրի ողջ տարածքում հնարավոր զինված բողոքի ցույցերի մասին, որոնք կարող են տեղի ունենալ ԱՄՆ նորընտիր նախագահ Ջո Բայդենի երդմնակալության արարողությունից առաջ, գրում է BBC-ն։

Նշվում է, որ տեղեկություններ կան զինված խմբավորումների մասին, որոնք ծրագրում են հավաքվել բոլոր 50 նահանգների գլխավոր քաղաքներում ու Վաշինգտոնում հունվարի 20-ին կայանալիք երդմնակալության արարողությունից առաջ։ Նման մտավախություններ են առաջացել այն բանից հետո, ինչ երկրում ուժեղացվեցին անվտանգության միջոցառումները՝ երդմնակալությունն անցկացնելու համար։

Մասնավորապես ԱՄՆ գործող նախագահ Դոնալդ Թրամփը արտակարգ դրություն է հայտարարել և դաշնային օգնություն ուղարկել Վաշինգտոնի իշխանություններին՝ հունվարի 20-ին նորընտիր նախագահ Ջո Բայդենի երդմնակալության արարողությունից առաջ անվտանգությունն ապահովելու համար: Այս մասին ասվում է Սպիտակ տան կողմից շրջանառվող փաստաթղթում: Նշվում է, որ արտակարգ դրությունը կտևի 2021 թվականի հունվարի 11-24-ը։

Հանգստյան օրերին  Վաշինգտոնի վարչակազմի ղեկավարին նման խնդրանքով էր դիմել Վաշինգտոնի քաղաքապետ Մյուրիել Բոուզերը ՝ Կոնգրեսի անկարգություններից հետո հնարավոր սպառնալիքների պատճառով:

Նման որոշումը թույլ կտա դաշնային իշխանություններին արագացված կարգով օգնության միջոցներ հատկացնել քաղաքին։ Նշենք, որ սովորաբար երկրի ղեկավարը նման արտակարգ իրավիճակ է հայտարարում տարերային աղետների ժամանակ՝ հրատապ օգնություն հասցնելու համար։

Տաթև Ֆռանգյան