ԱԺ արտահերթ նիստում քվեարկության ներկայացվեցին մի շարք նախագծեր

Խորհրդարանը արտահերթ նիստում հատուկ ընթացակարգով նախաձեռնեց այսօր քննարկված մի քանի նախագծերի քվեարկությունը։ «Պետական պաշտոններ զբաղեցրած անձանց սոցիալական երաշխիքների մասին» և «Հայաստանի Հանրապետության քննչական կոմիտեի մասին» ՀՀ օրենքների նախագծերի փաթեթն առաջին ընթերցմամբ ընդունվեց 55 կողմ, 25 դեմ ձայների հարաբերակցությամբ։ 

«Հեռուստատեսության և ռադիոյի մասին» ՀՀ օրենքի նախագծում լրացումներ և փոփոխություններ կատարելու քվեարկության ժամանակ վարման կարգով խոսեց «Ելք» խմբակցության ղեկավար Նիկոլ Փաշինյանը՝ հայտարարելով, որ առաջին ընթերցման ժամանակ կողմ կքվեարկեն:

«Բայց մենք մարզային ռադիոյի հեռարձակման կամ տուրքի հետ կապված առաջարկություն ունենք, կներկայացնենք»,-ասաց նա։

Նախագիծն առաջին ընթերցմամբ ընդունվեց 87 կողմ, 0 դեմ և 0 ձեռնպահ ձայների հարաբերակցությամբ։

«Միջազգային պայմանագրերի մասին» ՀՀ օրենքում փոփոխություններ և լրացումներ կատարելու մասին օրենքի նախագիծն ընդունվեց 89 կողմ, 0 դեմ և 0 ձեռնպահ ձայներով։

Առաջին ընթերցմամբ քվեարկության ներկայացվեց նաև «Իրավական ակտերի մասին» ՀՀ օրենքում փոփոխություններ կատարելու մասին օրենքի նախագիծը, այն ընդունվեց 89 կողմ ձայներով։

«Հայաստանի Հանրապետության կառավարության կառուցվածքի մասին» ՀՀ օրենքում փոփոխություն կատարելու մասին նախագծի քվեարկությունից առաջ վարման կարգով խոսեց «Ելք» խմբակցության պատգամավոր Էդմոն Մարուքյանը՝ հայտարարելով, որ նախաձեռնություն են հղել կառավարությանը, այժմ դեմ կքվեարկեն, եթե իրենց առաջարկությունները ներառվեն, երկրորդ ընթերցման ժամանակ կողմ կքվեարկեն։ Օրենքի նախագիծն առաջին ընթերցմամբ ընդունվեց 58 կողմ, 11 դեմ և 19 ձեռնպահ ձայների հարաբերակցությամբ։

Սեդա Ղուկասյան