16.12.2025 | 15:36
Ճամբարակի համայնքապետին պատկանող ինքնակամ շինությունը պետք է քանդվի․ Դատախազությունը միջնորդագիր է ուղարկել
Լիտվայում սկսվել է Բելառուսում մարդկության դեմ հանցագործությունների հետաքննությունը
Քաղաքականություն
09.12.2020 | 20:58
Լիտվայում սկսվել է Բելառուսում մարդկության դեմ հանցագործությունների մինչդատական հետաքննությունը։ Գործը բացվել է Բելառուսի քաղաքացու հայցի հիման վրա, որն այժմ բնակվում է Լիտվայում։ Նա բողոքել է Մինսկում ոստիկանների կողմից իր հանդեպ բռնի գործողություններից, ասվում է Լիտվայի Գլխավոր դատախազության տարածած հաղորդագրությունում, գրում է DW-ի ռուսական ծառայությունը։
Դրանում նշվում է, որ Լիտվայի գլխավոր դատախազ Էվալդաս Պաշիլիսը սկսել է մինչդատական հետաքննություն՝ համաձայն Լիտվայի Հանրապետության Քրեական օրենսգրքի «Խոշտանգում» և «Մարդկության դեմ ուղղված հանցագործություններ և ռազմական հանցագործություններ» հոդվածների։
«Դիմումատուի կողմից նշված միջադեպի հանգամանքները և դատախազություն ներկայացված այլ տվյալները գնահատվել են որպես հանցագործության նշաններ, որոնց վրա տարածվում է համընդհանուր իրավասությունը՝ համաձայն Լիտվայի Հանրապետության Քրեական օրենսգրքի»,- հայտարարել է Պաշիլիսը:
Նա պարզաբանել է, որ «համընդհանուր իրավասություն նշանակում է, որ միջազգային պայմանագրերին համապատասխան հանցագործությունների համար քրեական պատասխանատվությունը կիրառվում է՝ անկախ զոհերի և կասկածյալների քաղաքացիությունից, հանցագործության կատարման վայրից և անկախ այն բանից՝ արդյո՞ք այդ հանցագործությունների համար օրենքով պատժվում են այն երկրում, որտեղ կատարվել է հանցագործությունը»:
Լիտվայում այդ հանցագործությունները ներառում են խոշտանգումները, մարդկության դեմ ուղղված հանցագործությունները, շեշտել է Պաշիլիսը:
Տաթև Ֆռանգյան
