Անպատժելիության մթնոլորտի վերացումն անհրաժեշտություն է հատկապես մեր պետության համար. Գևորգ Կոստանյան

«Եթե այդ հանցագործությունն անպատժելիության հետևանք է, ապա դա ավելի մեծ հանցագործություն է, քան կատարված հանցագործությունը»,- Factor.am-ի հետ զրույցում անդրադառնալով հունվարի 8-ին տեղի ունեցած վթարին և դրա ողբերգական հետևանքներին, ասաց նախկին գլխավոր դատախազ, հանրապետական պատգամավոր Գևորգ Կոստանյանը:

Հիշեցնենք՝ հունվարի 8-ին՝ ժամը 04:40-ի սահմաններում, Երևան քաղաքի Սայաթ-Նովա պողոտայի և Աբովյան փողոցի խաչմերուկում բախվել են «ԲՄՎX6» մակնիշի, 35 NT 388 հաշվառման համարանիշի և «Տոյոտա» մակնիշի, 243 II 02 հաշվառման համարանիշի ավտոմեքենաները, որից հետո «ԲՄՎX6» մակնիշի ավտոմեքենան դուրս է եկել երթևեկելի գոտուց և հարվածել գովազդային վահանակին:

Ավտովթարի հետևանքով «Տոյոտա» մակնիշի, 243 II 02 հաշվառման համարանիշի ավտոմեքենայի վարորդ՝ ՃՈ 1-ին գումարտակի 6-րդ դասակի տեսուչ, ոստիկանության ավագ լեյտենանտ Ա.Դավթյանը և ուղևոր՝ ոստիկանության լեյտենանտ Խ.Գասպարյանը, ստացած մարմնական վնասվածքներից մահացել են։

Ավտովթարից հետո «ԲՄՎX6» մակնիշի ավտոմեքենայի վարորդը, թողնելով ճանապարհատրանսպորտային պատահարի վայրը, հեռացել է: 

Factor.am-ի հարցին՝ արդյոք անպատժելիության հետևանք չէ՞ր տեղի ունեցածը, նախկին գլխավոր դատախազը պատասխանեց. «Ես չեմ կարող և ցանկություն չունեմ կոնկրետ դեպքերը մեկնաբանել»:

Մեր հստակեցնող հարցին՝  Հայաստանում անպատժելիության մթնոլորտ չի՞ տիրում, Գևորգ Կոստանյանն ասաց. «Ես նման բան չասացի, անպատժելիության մթնոլորտի վերացումն անհրաժեշտություն է ցանկացած պետության և հատկապես մեր պետության համար»:

Մանրամասները՝ տեսանյութում:

Շողիկ Գալստյան