Նիկոլ Փաշինյանի և Արտաշես Գեղամյանի ձեռնամարտի հարցը՝ ԱԺ մշտական հանձնաժողովի նիստում

Ազգային ժողովի պետաիրավական հարցերի մշտական հանձնաժողովի նիստում վաղը  կքննարկվի հանրապետական պատգամավոր Արտաշես Գեղամյանի կողմից պատգամավորական էթիկային կանոնները խախտելու վերաբերյալ Ազգային ժողով եզրակացություն ներկայացնելու համար ԱԺ էթիկայի ժամանակավոր հանձնաժողով ստեղծելու  մասին ԱԺ որոշման նախագիծը:

«Ազգային ժողովի կանոնակարգ» սահմանադրական օրենքի համաձայն՝ նախկինում էթիկայի մշտական հանձնաժողովն այսուհետ ստեղծվում է որպես ժամանակավոր հանձնաժողով՝ կոնկրետ դեպքի անդրադառնալու համար:

6-րդ գումարման Ազգային ժողովում առաջին անգամն  է, երբ  խմբակցությունը ներկայացնում է էթիկայի ժամանակավոր հանձնաժողով ստեղծելու որոշման նախագիծ:

Նախագծի ընդունման նպատակն է ստեղծել ԱԺ ժամանակավոր հանձնաժողով՝ քննության առնելու ԱԺ «Ելք» խմբակցության ղեկավար Նիկոլ Փաշինյանի հայտարարությունն այն մասին, թե ԱԺ ՀՀԿ խմբակցության պատգամավոր Արտաշես Գեղամյանը 2017 հոկտեմբերի 5-ին ԱԺ միջանցքում բռունցքներով հարձակվել է իր վրա։

Նախագծում նաև ասվում է, որ օրենսդիր մարմնի ներկայացուցչի՝ Արտաշես Գեղամյանի կողմից նման վարգաքագծի դրսևորումը անհամատեղելի է բարձրաստիճան պաշտոնատար անձի վարքագծի նորմերի հետ, քանի որ Ազգային ժողովի պատգամավորը պետք է հարգալից վերաբերմունք ցուցաբերի հանրության նկատմամբ, պարկեշտ և օրինակելի լինի՝ ոչ միայն պատգամավորական լիազորությունները իրականացնելիս, այլ նաև ամենօրյա կյանքում:

Հիշեցնենք, որ մոտ երեք ամիս առաջ  էթիկայի ժամանակավոր հանձնաժողով ստեղծելու նախագծի քննարկումը հետաձգվել էր՝ այն լրամշակելու նպատակով: