Գերմանիայի, Ֆրանսիայի ու Մեծ Բրիտանիայի ԱԳ ղեկավարները քննարկել են Իրանի միջուկային ծրագրի շուրջ գործողությունների միասնական ծրագիրը․ ՏԱՍՍ

Գերմանիայի ԱԳՆ ղեկավար Հայկո Մաասը Բեռլինում իր բրիտանացի ու ֆրանսիացի գործընկերներ Դոմինիկ Ռաաբի ու Ժան-Իվ Լե Դրիանի հետ քննարկել է Իրանի միջուկային ծրագրի շուրջ գործողությունների միասնական համապարփակ ծրագրի պահպանման հեռանկարները։ Այս մասին այսօր կայացած ճեպազրույցի ժամանակ հայտարարել է Գերմանիայի արտգործնախարարության ներկայացուցիչ Անդրեա Զաասը, գրում է ՏԱՍՍ-ը։

«Տեղեկացնեմ, որ նախարար Մաասն այսօր իր ֆրանսիացի և բրիտանացի գործընկերներին ընդունում է Բորցիգ վիլլայում: Հանդիպումն սկսվել է րոպեներ առաջ։ Ուշադրության կենտրոնում է լինելու Իրանի հետ միջուկային գործարքը: Նախարարները մի քանի անգամ պարզ հասկացրել են, որ  կողմ են Իրանի միջուկային ծրագրի շուրջ գործողությունների միասնական, համապարփակ ծրագրի պահպանմանը։ Մեր կարծիքով՝ Իրանը համակարգված կերպով խախտում է համաձայնագիրը», – հավելել է նա:

ԳԴՀ արտաքին գերատեսչության խոսնակի խոսքով՝ «արտգործնախարարները ցանկանում են քննարկել, թե հետագա գործողությունները ինչ տեսք կարող են ունենալ, եթե ներգրավվեն պայմանագիրը ստորագրած բոլոր կողմերը, ինչպես նաև ԱՄՆ նոր վարչակազմը»:

«Մենք համոզված ենք, որ Վիեննայի համաձայնագրի վերաբերյալ Միացյալ Նահանգների կառուցողական դիրքորոշումը կարող է էապես օգնել դադարեցնել այն բացասական պարույրը, որը մենք տեսնում ենք Իրանի հետ հարաբերություններում և բացելու Իրանի միջուկային ծրագրի շուրջ գործողությունների միասնական համապարփակ ծրագրի պահպանման նոր հեռանկարները», – հայտարարել է նա:

Տաթև Ֆռանգյան