Տաք ձմեռը սպառնալի՞ք է գյուղատնտեսությանը, թե՞ ջերմոցային մթերքների էժանացման նախադրյալ․ փոխնախարարի մեկնաբանությունը

ԱԻՆ հիդրոմետ ծառայությունից տեղեկանում ենք, որ առաջիկա օրերին սպասվում է առանց տեղումների եղանակ։ Այս տարին առհասարակ աչքի ընկավ սակավ ձյունով ու տաք եղանակով։ Խանութներում ժամանակից շուտ հայտնվել է ձնծաղիկը, որոշ ծառեր բողբոջել են։ Factor.am-ը գյուղատնտեսության փոխնախարար Աշոտ Հարությունյանից հետաքրքրվեց՝ արդյոք գյուղատնտեսության համար վտանգավոր չէ նման տաք եղանակը և ինչ հետևանքներ այն կարող է ունենալ: 

«Այս պահի դրությամբ գյուղատնտեսության առումով միակ անհանգստացնող բանն այն է, որ անոմալ եղանակ է։ Այս պահին արձանագրված ջերմաստիճանները՝ ցերեկվա դրականն ու գիշերվա բացասականը, բալանսը պահում են։ Այսինքն բույսերի մոտ հյութաշարժություն չի սկսվել, բույսերը գտնվում են հարաբերական հանգստի շրջանում։ Պետք է կենսաբանական զրո լինի, որ հյութաշարժությունը սկսվի, դա այն ջերմաստիճանն է, երբ ընդհանրապես հողում, օդում ջերմաստճանը 7 աստիճանից բարձր պահպանվում է 10-15 օր։ Բայց քանի որ նման բան այս պահին չկա, նշանակում է այդ խնդիրը չունենք»,- տեղեկացրեց փոխնախարարը։

Նա նաև նշեց, որ աշնանացանի հետ կապված վտանգներ ևս չկան, իսկ մտավախությունը մեկն է․«Մեր հետագա մտավախությունն այն է, որ հանկարծ ջերմաստիճանը կտրուկ չիջնի առանց տեղումների և ցրտահարման վտանգի առաջ չկանգնենք։ Այլ խնդիրներ չկան»։

Փոխնախարարի պնդմամբ` տաք եղանակն ունի դրական ազդեցություն, այն կարող է հիմք հանդիսանալ, որպեսզի ջերմոցային մթերքների գներն իջնեն: «Ջերմոցատներում տաք եղանակի շնորհիվ քիչ հոսանք է ծախսվում։ Արտադրված գյուղամթերքը կարող է ցածր գին ունենալ»,- եզրափակեց նա։

Լիլիթ Շաբոյան