27.11.2024 | 22:49
Երևանի քաղաքապետն այցելել է Լոս Անջելեսի տրանսպորտի կառավարման կենտրոն
ԵՄ-ն միասնական ռազմական դոկտրին է մշակում․ Reuters
Քաղաքականություն
19.11.2020 | 18:32
Եվրամիությունը պատրաստվում է մշակել սեփական ռազմական դոկտրինը, որը կսահմանի պաշտպանության ոլորտում նպատակները, հավակնություններն ու սպառնալիքները, միևնույն ժամանակ կենտրոնանալով զենքի համատեղ մշակման վեց նոր ոլորտների ուղղությամբ, գրում է Reuters-ը։
ԵՄ «Ռազմավարական ուղեցույցի» մշակումը, որը նման է լինելու ՆԱՏՕ-ի՝ դաշինքի նպատակները սահմանող «Ռազմավարական հայեցակարգին», պաշտպանական ոլորտում ԵՄ-ի համագործակցությունը խորացնելու ջանքերի արագացման վերջին քայլն է:
ԱՄՆ նախագահ Դոնալդ Թրամփի օրոք ՆԱՏՕ-ի հանդեպ չորսամյա թշնամանքից հետո, ԵՄ-ն՝ Ֆրանսիայի գլխավորությամբ, ցանկանում է դառնալ ինքնուրույն ռազմական տերություն, որը բավականաչափ հզոր կլինի՝ ինքնուրույն պայքարելու համար, ինչպես նաև Միացյալ Նահանգների համար ավելի օգտակար դաշնակից կլինի:
ԵՄ բարձրաստիճան դիվանագետ Ջոզեպ Բորելն այսօր կայացած տեսակոնֆերանսի ժամանակ ԵՄ արտաքին գործերի նախարարներին է ներկայացրել գաղտնի, հետախուզական տվյալների վրա հիմնված սպառնալիքների վերլուծության վերաբերյալ տվյալներ։ Ակնկալվում է, որ ԵՄ պաշտպանության նախարարները արդեն իսկ կսկսեն վիրտուալ հարթակում աշխատանքները ՝ նպատակ ունենալով վերջնական փաստաթուղթ ներկայացնել 2022 թվականին:
«Մենք պետք է ուղեցույց ստեղծենք: Սա աշխարհին նայելու, սպառնալիքները բացահայտելու և դրանց միասնական դիմակայելու սովորական միջոց է », – հայտարարել է Բորելը:
Տաթև Ֆռանգյան
