12.10.2026 | 13:08
ԱՄՆ-ը սպառնում է արգելափակել Ուկրաինային զենքի մատակարարումը՝ ռուսական նավթավերամշակման գործարաններին հարվածների պատճառով․ FT
Վերջին հոսպիտալացումից առաջ․ Արմեն Ջիգարխանյանի որդին լուսանկար է հրապարակել
Մշակույթ
16.11.2020 | 14:02
Արմեն Ջիգարխանյանի որդին՝ Ստեփան Ջիգարխանյանն Instagram-ի իր էջում հանրահայտ դերասանի վերջին լուսանկարներից մեկն է հրապարակել։ Դրանում Ջիգարխանյանը իր երկրորդ կնոջ՝ Տատյանա Վլասովայի հետ է, գրում է ՌԻԱ Նովոստին։
«Վերջին հոսպիտալացումից կարճ ժամանակ առաջ»,- լուսանկարին կից գրել է Ջիգարխանյանի որդին։
Հիշեցնենք՝ Արմեն Ջիգարխանյանը կյանքից հեռացել է նոյեմբերի 13-ին, 85 տարեկանում։
Ջիգարխանյանն ընդհանուր առմամբ խաղացել է մի քանի հարյուր դեր կինոյում՝ դառնալով ամենաշատ նկարահանվող ռուսական դերասաններից մեկը։ Նա կերտել է բազմաբովանդակ դերեր լավագույն ռուսական և խորհրդային ռեժիսորների ֆիլմերում, տարբեր ժանրերի ժապավեններում, կատակերգական և արկածային կինոնկարներում, դրամաներում և երաժշտական ֆիլմերում։
1991 թվականից 1996 թվականը, որպես պրոֆեսոր, դերասանական վարպետություն է դասավանդել ՎԳԻԿ-ում (Կինեմատոգրաֆիայի համառուսական պետական ինստիտուտ), 1996-ին ստեղծել է Մոսկվայի դրամատիկական թատրոնը։ Խորհրդային մշակույթի զարգացման գործում մեծ ավանդի համար Արմեն Ջիգարխանյանն արժանացել է ԽՍՀՄ Ժողովրդական դերասանի կոչմանը, պարգևատրվել է կառավարական շքանշաններով։
Արմեն Ջիգարխանյանի անունը ներառվել է Գինեսի ռեկորդների գիրքում՝ որպես ամենաշատ նկարահանվող ռուսական դերասան (ավելի քան 250 դերակատարում կինոյում և հեռուստաֆիլմերում)։
Տաթև Ֆռանգյան
